Hoofiezerwörm
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
De hoofiezerwörm of snorwörm (Phoronida, geneump nao de Griekse mythologische figuur Phoronis) is 'ne stam van dere wovan slechs tieën saorte bekandj zeen.
Dees bieëstere, die toet 20 cm lank waere, höbben e plómp, lankwerpig lief mit 'n oetstölping anen achterkantj die fungeertj es 'n anker womit 't bieës zich in ziene kaoker of 'ne gank kan vaszètte. Euvere móndj haer hingk 'ne korte lup, 't epistoom, en is ómringk mit 'nen hoofiezerechtige lofofoor mit taalrieke lang tentakele die zeen verzeen van trilhaore. d'n Derm is U-vörmig.
Hoofiezerwörm laeve toet op 'n deepdje van 50 maeter oppe baom vanne zieë en maken 'ne vlezige kaoker in dretsjderige zandjbäöm of baore geng in kalkstein en sjelpe. De kaokers worin zie laeve staon döks in gruup biejein. Ze vörmen aevel gein kelonies, wie de verwantje mosbieëster. Ze höbben 'n groeate ecologische waerd, ómdet ze mit häör baoraktiviteite de sjelpe vergruzen enne kalkstein äöpene wodoor dees toegenkelik waere veur anger baorendje organisme.
De bieëster vergaore micro-organismen en organisch aafval mit behölp vanne tentakele.