Palataal
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
'ne Palataal is 'n saort aan mitklinker dae t'r wuuertj oetgespraoke door 't middelste vanne tóng of 't bakdeil daovan op te duje nao 't hel verhieëmeldje.
Eine vanne wieds-verbrèdje klenk in spraoke is de palatalen approximant [j], mer ouch is de palatale nasaal [ɲ] hieël väöl veurkómmendj (in zoeaget 35% vanne spraoken oppe werreld). Inne meiste spraoke contrasteertj de palatale nasaal neet mit palataal plosieve, zowie de stumloeaze palatale plosief [c], meh mit pósalveolair affricate, wie [tʃ]. De Limbörgse dialekte mit mouillering zeen den ouch biezunjer in det ze de palatale nasaal zowaal mit pósalveolair affricaten es mit palataal plosieve contrasteertj; anger spraoke worin det ouch gebeurtj zeen 't Tsjechisch, Slowaaks, Hongaars en Albanees.
Bie väöl spraoke, worónger 't Nederlandjs, waere palataal klenk neet fonematisch óngersjeie van palataal clusters: unionist [ʔy̱nijo'nɪst ~ ʔy̱njo'nɪst ~ ʔy̱ɲo'nɪst]. In 't Limbörgs is det van aadshaeroet waal 't val: Sjènne ['ʃe̞nə] taenge patiënt [pɐ'sjǽn̥:t] ([sj] is 'n apaart cluster van 't foneem [ʃ]); ónger invlood vanne Nederlandjse standerdspraok is dit óngersjied aevel troebbel gewaore. 'n Anger spraok die dit óngersjied nag dudelik haet is 't Spaans: uñón [u'ɲon] "groeate nagel" taenge unión [u'njon] "uunje/unie"; mer ouch in 't Frans: les jeux [le'ʒø] "de speller" taenge les yeux [le'zjø] "de ouge".