Noam Chomsky

Van Wikipedia
Gank nao: navigatie, zeuke

Dit artikel is gesjreve in 't Mofers. 't Weurt gewaardeerd óm in dit artikel 't Mofers aan te hauwe of aan te gaeve welk anger dialek gebroek is.


Noam Chomsky.

Avram Noam Chomsky (Philadelphia (Pennsylvania), 7 dieëtsember 1928) is 'nen Amerikaanse spraokkóndige, filosoof, mediakritieker, politisch-activis en anarchistischen dinker. Chomsky is emeritus hoeaglieërer inne spraokkónde aan 't Massachusetts Institute of Technology. Es gróndjlègker vanne generatieve spraokkónde is hae d'n invloodriekste spraokweitesjapper vannen twintjigsten ieëf. Nao 'n ieëder gróndjvèsting vanne structuralistische spraokkónde door Ferdinand de Saussure al ane begin vannen twintjigsten ieëf, dominere Chomsky zien theorieje de spraokkónde vanaaf róndj 1964.

De kern van Chomsky zien spraokkónde is de hypothees vanne universeel grammair: 'n aangebaore spraokvermeuge det alle luuj deilen en det de euvereinkómste tösse miensjelike spraoke verklaortj. Chomsky zien spraokkónde is rationalistisch (in taengestèlling toet empiristisch). Zien inzichte mèndje d'n doeadsteek veure behaviouristische spraokkónde en 'ne stimulans veure cognitieweitesjappe. In 't verlingdje vanne generatieve grammair óntwikkeldje d'r de Chomsky-hiërarchie, 'n väöl-gebroekdje classificatie van formeel spraoke mit informaticatoepassinge.

Daonaeve steitj Chomsky bekèndj es 'ne politisch-activis. Hae sjreef kritische beuk euvere Amerikaanse boetelandjse politiek enne rol van ideologie en media in westerse samelaevinge. Chomsky besjoewtj zichzelf es 'n Libertarische socialis en in väöl opzichten es anarchis en anarchosyndicalis.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Noam_Chomsky&oldid=396714"