Neil Armstrong

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.


Neil Armstrong op de maon in maonlander Eagle, kort nao de maonwandeling.

Neil Alden Armstrong (Wapakoneta (Ohio), 5 augustus 1930 - Columbus (Ohio), 25 augustus 2012) waor 'nen Amerikaanse tespiloot en astronaut. Heer zat op 21 juli 1969 (20 juli in de Vereinegde Staote) es ierste mins voot op de maon.

Armstrong heet gedeend in de Koreaansen Oorlog es gevechspiloot veur de U.S. Navy. Heer studeerde aon de Purdue-universiteit en behaolde 't bachelors-diploma vaan luchtvaartkundeg ingenieur in 1955. Later woort heer tespiloot veur de NASA en bestuurde zeve kier 't X-15-vleegmasjien, wat 't snelheidsrecord in de loch vestegde en tot 70 kilometer huugde kaom. In 1962 woort heer door de NASA geselecteerd es astronaut. Heer waor de commandant vaan de Gemini 8-missie, die in 1966 es ierste 'n koppeling tösse twie ruimtevaartuige bewèrkstèllegde. Heer waor daobij de commandant vaan 't vervaangingsteam veur de Apollo 8-missie.

In 1969 waor heer de commandant vaan de Apollo 11-missie um op de maon te lande. Heer oontsnapte in 1968 op 't nipperke aon d'n doed tijdes 'n training veur de maonlanding. Tijdes de eigeleke missie naom heer twie minute en 21 seconde veur de landing de controle euver vaan de maonlandingsmodule Eagle umtot de otomatische landing dreigde plaots te vinde in 'n gebeed mèt väöl klein kraters en "rotsblokke zoe groet wie Volkswages", en zat häör neer in e vlaak gebeed, inkel hoonderde meters weier [1]. Inkel ore later stapde heer oet de maonlander. Wie heer d'n ierste voot op de maonbojem zat, spraok heer de zin:

"That's one small step for a man, one giant leap for mankind."

De 'a' in "for a man" woort evels biezunder kort oetgesproke, en door de slechte kwaliteit vaan de geluidsverbinding woort de zin wereldberoemd es "That's one small step for man, one giant leap for mankind." (wat semantisch gezeen oonzin is, umtot man daan dezelfde beteikenis heet es mankind). Zelf beweerde Armstrong tot heer de 'a' wel degelek had oetgesproke, of althans had bedoeld um ze oet te spreke. Analyses mèt modern computertechnieke vaan de betreffende geluidsopname geve häöm hei-in geliek: heer heet de 'a' wél oetgesproke. [2]

Luuster in Ogg Vorbis nao de origineel wäörd: That's one small step for (a) man, one giant leap for mankind.

In 1970 verleet Armstrong de NASA[3]. Heer haolde datzelfde jaor 'ne masters-titel in ruimtevaarttechniek aon de universiteit vaan Zuid-Californië. Heer woort hoeglieraar loch- en ruimtevaarttechniek aon de universiteit vaan Cincinnati en koch in 't kortbij gelege Lebanon 'n boerderij mèt 40 hectare groond woe heer in deiltied 'n boerebedrief begós.

In augustus 2012 woort Armstronf aon zie hart geopereerd. Op de 25e vaan dee maond storf heer in 'nen hospitaol.

Referenties[bewirk | brontekst bewerken]

  1. Apollo 11 Lunar Surface Journal
  2. Hear what Neil Armstrong really said on the moon | Front page | Chron.com - Houston Chronicle
  3. NASA (2009). Worldbook at NASA - Neil Armstrong. Bekeke op 22 miert 2010.
Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Neil_Armstrong&oldid=350715"