Monstrans
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
'n Monstrans ies bie de Katholieke 'n kunstig verseerd en bewèrk liturgisch veurwerp, woa-in de geconsacreerde hostie ziechbaar, achter glaas, weurt getuènd. 't Woord kump vanoet 't Latien. 'ne Andere naam ies ostensorium. 't Materiaal woavan de monstrans gemaak ies ies meistens goud en/of zilver.
'ne Preester of geistelike lièt 'n monstrans zeen in religieus deenste zoa es 't Lof en bie 't Vièrtig oeregebed. Ouch in de brónk of processie weurt de monstrans mètgedrage. Veur dees gelegenheid löp de geistelike mèt monstrans ónder 'ne hemel of baldakien, dae gedrage weurt door 4 parochiane. 't Rónddrage in processie vingk plaats op de fièsdaag van 't Heilig sacrament, (twiède donderdig nao Pinkstere).
Nao 't Twiède Vaticaans concilie ies 't róndgoon mèt de monstrans neet miè zoa algemein.