Miensjelike seksualiteit
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
Miensjelike seksualiteit ies e complex van geveules en handelinge die 'ne miensj kènt ervare of oetveure en die samehange mèt lichamelike geveules mèt betrèkking op 'ne andere persoon. Sommige luuj gebruke 'n inger definitie en zeen seksualiteit es de lös nao gesjlachsgemeinsjap tösje luuj en de gesjlachsgemeinsjap zelf.
Seksualiteit ies veur luuj van belang veur de veurtplanting, veur bevestiging van 'n relatie tösje persone, en neet in de lètste plaats veur 't beleve van genot. In sómmig culture liek op 't eupelik kalle euver seksualiteit e religieus taboe, of ies 't beoefene van seksualiteit veur sómmige zelfs verbao (bieveurbeeld veur Roums-Katholieke geistelike, 't zoageneumde celibaat). Vanoet religieus of maatsjappelike euvertuging kènt me vinge dat seksualiteit (in de zin van gesjlachsgemeinsjap) allein binne 'n huweliksrelatie kèn plaatsvinge.