Mechanische sporte

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.


Racende oto's in de Formule 1 (hei op de GP vaan Maleisië).

Mechanische sporte, ouch wel motorsporte geneump (allewel tot dat verwarrend kin wèrke) zien die sporte boebij me gein minseleke of dierleke krach gebruuk meh door middel vaan motore prestaties moot lievere. Gemeinelek geit 't heibij um de snelheid; mechanische sporte höbbe dus de vörm vaan 'ne race of wèdloup. Bij mechanische sporte weurt de veerdegheid vaan de sporter gecombineerd mèt de kwaliteit vaan 't materiaol; inferieur veurtuige make 't extreem lesteg um 'ne race te winne. Hei-in liekene dees sporte op de peerdssport (boe me vaan de kwaliteit vaan 't peerd aofhenkelek is), en in minder maote ouch op sporte wie fietserenne en sjaatse (boe me wel zelf de krach lievert meh boe 't materiaol väöl vaan de snelheid bepaolt).

De bekindste en geleefste mechanische sporte zien otorace en motorrace, die allebei in diverse klasse zien ingedeild. Heibij weurt op 'n baon gevare, gemeinelek mierder rundes. Los daovaan stoon de rally en de motorcross, boebij me in ope veld veurt. Ouch mèt motorbote weurt soms gerace. E veurbeeld vaan 'ne neet op snelheid geriechde mechanische sport is otopolo, wat neet väöl weurt gedoon.

Motorbootrace stoont op 't program vaan de Olympische Speule in 1908. Sindsdeen zien mechanische sporte neet mie op de Speule veurgekoume, umtot 't Olympisch Comité besloot ze te were.

Bekinde machanische sporters oet de Limbörge zien pa en zoon Jos en Max Verstappen, die in de Formule 1 vore resp. vare.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Mechanische_sporte&oldid=393818"