Mathieu Vroemen
- Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Nuujsjtads, es te dit dialek sjpriks.
Mathieu Eugène Jean Marie Vroemen (Tjeu) woort gebore op 2 december 1921 in Nuujsjtad. Hae sjtorf 11 augustus 1988 in Mestreech. Zien vrouw Maria Jans Willemina Jager (Riet) woort gebore op 13 februari 1921 ine Nijmege en sjtorf 21 juni 1996. 't echpaar woonde aan de Lage Kanaaldijk 128 in Mestreech.
Riet waor textielkunstenares (weeftechniek) en Tjeu waor graficus, teikenaer, teikenleraar (aan 't Henric van Veldeke College in Mestreech) en ouch textielkunstenaer (weeftechniek). Same zörgde ze veur de aankleiing van de figure in 't kaersjtafereel van de kiekkaste in de kèrk van Sint Pieter bove. Ouch Dries Engelen, Kees van de Vosse en Agnès Creyghton-Motké leverde hun biedrage in 't make van de beelde.
Tjeu verzörgde de illustraties en de lay-out veur de bloomlezing "Eus eige leedsjes", van Mestreechse volksleedsjes, samegesjtèld door Charles Thewissen in opdrach van de ENCI bie gelegenheid van 't in gebruuk numme van de achste cementove in 1968.