Marc Delissen

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.


Marcus Johannes Elisabeth Leopold (Marc) Delissen (Amsterdam, 14 jannewarie 1965) is 'ne veurmalige Nederlandjse hockeyer, dae in zien carrière 261 interlandjs sjpeelde veur de Nederlandjse nationale ploog. Hae scoorde in dees wedsjtrieje 98 keër.

Loupbaan[bewirk | brón bewèrke]

Delissen woort gebaore in Amsterdam mer greujde op in ’t Limburgse Maorveldj biej Gäöl. Hae sjpeelde mèt ziene broor Robbert – later ouch international – biej de Hockeyclub Gelaen, die door hun toedoon van de veerde nao de eësjte klas promeveerde. Later góng hae sjpele biej HOC Gazellen Combinatie (HGC) in Wassenaar, wó hae in de vootsjpaore trooj van ziene vormgaever Wouter Leefers. Hae maakde op neugetieënjaorige laeftied, op 21 oktober 1984, zien interlandjdebuut in de oefenwedsjtried Nederlandj-Ierlandj (1-0) in Londe.

Hae wón mèt HGC tweë landjstitele: in 1990 en 1996. Mèt 't Nederlands èlftal woort hae in 1987 Europees kampioen en in 1990 waereldkampioen. Mèt ’t nationale team nóm hae es sjpelbepaolende middeveldjer en 'valsje sjpits' drie keër deil aan de Olympische Sjpele, in 1988, 1992 en 1996. Naodat hae in 1988 in Seoel al èns de brónze medajje hej gewónne, behaolde hae in 1996 in Atalanta zien groatste succes door dao de gouwe medajje te winne. In 2000 waas hae es assistent-bóndjscoach van Maurits Hendriks opnuuj succesvol wiej zien team mèt ein gouwe medajje de Olympische titel prolongeerde. Es sjpeler droog hae ouch jaorelank de aanveurdersbandj biej ’t Nederlandjs èlftal.

Delissen is nao zien loupbaan es hockeyer wirkzaam es advocaat in Den Haag en van midde 2002 pes ’t veurjaor van 2005 hoofcoach biej de mannehockeyploog van HGC.

Externe link[bewirk | brón bewèrke]

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Marc_Delissen&oldid=434346"