Mestreech Aoke Airport

Dit artikel is gesjreve in 't Oeals. Ómdat 't plaatsgebónge is, maogs doe 't ómzètte nao 't Baeks, es te dit dialek sjpriks.

---

'ne Transavia Boeing 737 op Mestreech Aoke Airport

Mestreech Aoke Airport (ICAO: EHBK, IATA: MST) is ein van de grotere vleegveldjer in Nederlandj, mit ruum 41.000 vleegbewaeginge per jaor. De lochhave is gelaege aan'ne A2 in'ne gemeinte Baek, ach kilomaeter ten noorde van'ne sjtad Mestreech. Sinds 21 juli 2004 is OmDV, ein consortium van Omniport en Dura Vermeer, hoofdaandeilhaajer mit 70 procent van'ne aandeile. Daoveur waas de lochhave in'ne henj van NV Holding Businesspark Lochhave Mestreech.

Naeve ein aantal liendeenste, zo es toet 29 oktober 2008 driejmaol daags nao Sjiphol, drejt de lochhave veural op chartervluchte nao populair vakantiebesjtumminge en op regelmaotig vrachverveur. Drie keer in'ne waek vluug low-cost maatsjappiej Ryanair op 't Sjpaanse Barcelona-Girona, en d'r is ouch nog ein oetbreijing van'ne besjtumminge nao 't ouch in Sjpanje ligkendje Alicante en Valencia. Air Service Limburg maaktj ouch gebroek van'ne lochhaven door middel van rondjvluchte en vleeglesse en daonaeve waere d'r lochfoto's gemaaktj. Vanaaf eind 2007 is d'r weer ein nuje vleegsjool gevestig in'ne geboewe wo vreuger de Nationale lochvaartsjool zoaot, ze hétj Stella aviation academy. Op'pe lochhave is ein restaurant en ein hotel gevestigdj.

In 2007 verveurde de lochhave 160.000 passageers en 81.000 ton vrach.

Maatsjappieje

Passageers

• Ryanair (Alicante, Girona, Bari)
• Wizzair (Katowice)
• Vueling (Barcelona)
• Corendon (Antalya)
• AlbaStar (Lourdes)

Vracht

Vaste vrachtliendeenste

• Royal Air Jordania Cargo (Algiers, Amman-Queen Alia, Caïro)
• Cargolux (Luxemburg, Nairobi)
• Turkish Airlines (Istanbul-Atatürk, Chicago, Accra)
• West Atlantic (Coventry)

Bane

De vertrèk- en aankomshal van Mestreech Aoke Airport

Mestreech Aoke Airport besjiktj euver ein verherdje sjtart- en lanjingsbaan mit aan allebei de kenj ein ILS lanjingssysteem, en aan eine kantj ein ILS-Cat3

• 21 - 03 Dit is ein code veur ein bepaoldje sjtartbaan, ze is 2500 maeter langk mit eine sjtopway van 250 maeter, en 60 maeter breid.

Vreuger heatj d'r ouch ein tweede (kleiner) baan gelaege 07 - 25, dees waas 1080 maeter langk, maar dees is aafgebraoke.

Van Yankee-44 toet Vleegveldj Baek

Mit de sjtart van'ne gemotoriseerdje lochtvaart in 1904 mit de vluch van'ne gebreurs Wright noome de lochtvaartactiviteite in'ne waereld ein enorme vluch, om mit ein toepasselikke metafoor te sjpraeke. In dae tied koome klein vleegveldjes euveral in Nederlandj de kop op te sjtaeke. Al in 1919 waas d'r kort sjpraoke van ein vleegveldj in Mestreech es ein aankommendje lochtvaartmaatsjappiej, de Internationaal Lochtverveursongernuming (ILVO) ein terrein op'pe St. Pietersberg wiltj gebroeke. Maar dees maatsjappiej verdween al net zo sjnel es zie opkwaam en de planne verdwene in de ieskas. Maar de intresse van'ne gemeinte waas gewektj. In dae tied landje al allerlei vleegtuuge op plaatselikke weien tiedens feeste en demonsjtraties en waas 't logisch om die behoefte te bundele op ein centraal plaats.

In de dertiger jaore waare d'r versjillendje gemeintelikke en provinciale discussies om ein börgerlochvaartterrein te ontginne in zuudelik Limburg. Maar 't Ministerie van Landjsverdediging vonj det ein lochhave in Zuud-Limburg probleme veroorzaakdje in'ne sjtrategie van'ne landjsverdediging, terwiel 't Ministerie van Financiën ongertösse de beloofdje financiering veur ein groot deil tröktrok en de planne weer in'ne ieskas moste. In 1938 laaidje de discussie kort weer op toen ein plan waerdje geprizzenteerdj om 't zjweefvleegveldj bij Neerbaek oet te breije toet ein burgervleegveldj. 't Terrein bleek biej ongerzeuk ongesjiktj en de locasie biej Ulesjtraote waerdje weer genumpdj door de Lochvaartdeens. Ouch KLM directeur Drs. A. Plesman waas eine felle veurstenjer van ein lochhave in Zuud-Limburg, om ein binnelands lochnetwerk (det al 12 veldje groot waas) compleet te make. In 1939 sjtumde de Provinciale Sjtaote in mit de oprichting van'ne “Naamloze Vennootsjap Vleegveldj Zuid-Limburg”, eine eerste sjtap toet daadwerkelikke boew van ein vleegveldj. Maar 't begin van'ne Tweede Waereldoorlog loog de ratificatie door de gemeintebesjture dwars en de planne bleve ligke.

Yankee-44

Toen in september 1944 't Amerikaanse 7de legerkorps Zuud-Limburg bevriejdje, begos zie mit 't in gebroek numme van veldjes veur häör “Auster” verkennings- en observatievleegtuugskes. Maar de “9th Allied Tactical Airforce” (9th ATAF), 't Geallieerde lochcommando in 't gebied, wol gaer eine veuroetgesjaove basis om de opmars in Duitslandj good te kinne ongersjteune. Häör bases in Noord-Frankriek en Zuud-Belsj waare hiejveur ontoereikendj. Omdet 't hoofkwarteer van 't “28th Tactical Air Command” van de 9th ATAF in Mestreech gelegerdj waerdje, waerdje door de Geallieerde besjlaote ouch ein sjteunvleegveldj biej Mestreech aan te ligke. Op 27 januari 1945 vroog de Amerikaanse “Town Major” van Baek, de Geallieerde officeer verantjwaordelik veur de interactie tösse de militaire en burgerlikke mach, toesjtumming aan'ne burgemeisters van'ne omligkendje dörpe om 't terrein tösse Baek, Maerse en Ulesjtraote te mooge ontginne veur de aanligk van eine veuroetgesjaovn lochmachbasis. Nao ein sjnel onteigeningsprocedure begoste Amerikaanse genisten mit 't rooie van de circa 188 hectare boumgaerde en mit t aanvéure van doezendje tonne puin, aafkomstig van 't op 5 oktober 1942 per abuis gebombardeerdje Gelaen, ter fundering. Op 't puin waerdje sjtaole plate gelag en geklonke om zo ein 1.200 maeter lanjingsbaan te construeren. Ouch waerdje 89 verharde parkeerplaatse, eine hangar van 40 biej 60 maeter en ein ongergronds brandjsjtofdepot aangelag. De brandjsjtofdepots weardje euveriges gevoed vanoet de piepleiding PLUTO (Pipe Line Under The Ocean) die vanoet Normandië toet aan Mestreech waerdje doorgetrokke; 't Verste puntj det PLUTO ooit haetj bereiktj.

Vanaaf 22 meert 1945 waas 't vleegveldj operasioneel es ein van'ne teentalle veuroetgesjaove veldje van'ne 9th ATAF. Vanaaf dae daag opereerdje 't “31st Tactical Reconnaissance Squadron” (31st TRS) van'ne US Army Airforce vanaaf dit veldj, det inmiddels waas omgeduiptj toet “Airfield Y-44”, oftewaal “Yankee-44”. Dit verkenningssquadron vloog mit de F-6 verkenningsoetveuring van'ne bekindje P51 Mustang jager. Ziej waare eers op'pe basis in Jarny (Noord-Frankriek) gestasioneerdj. Op 19 april vertrokke ziej nao 't Yankee-80 vleegveldj biej Wiesbade in bezatj Duitslandj. Later opereerdje ouch anger eenhede vanaaf het veldj, zowie 't “39th Photo Reconnaissance Squadron” en 't “155th Photo Reconnaissance Squadron (Night)”. Ouch vlooge veur inkele waeke veer squadrons B26 “Marauder” lichte bommewerpers vanaaf Yankee 44. Dees waare afkomstig van'ne “387th Bombardment Group”. D'r waerdje gein inkel operasioneel missie oetgeveurdj vanaaf 't veldj, omdet de oorlog zo good es veurbiej waas in Duitslandj. Dees Group bleef toet en mit 24 mei 1945 op 't veldj en vertrok daonao nao Rosiers-en-Sauterre in Frankriek. Officieus waerdje 't vleegveldj eind mei al euvergedrage aan'ne Nederlandse autoriteiten, al hele de Amerikanen d'r waal ein opsie op. Ein klein contingent Nederlandse militaire waerdje d'r gelegerdj es oppassers, saame mit ein klein meteorologische ploog.

Nao de Duitse capitulatie verzochte de burgemeister van Baek en de Commissaris van de Keuningin aan 't Ministerie van Watersjtaot om van 't inmiddels verlaote vleegveldj een officieel “Burgerlochvaartterrein” te maake, 't terrein waas immers al ontgonne. Op 't verzeuk waerdje positief gereageerdj door de regering, eers vanoet Londen en later vanoet Den Haag. Per 1 augustus 1945 weardje 't besjloet effectief en waerdje Yankee-44 ein burgerlochhave. Es in augustus 1945 de “Regeeringsvliegdienst” weurdj ingesjteldj om de verbinjing tösse 't regeringscentrum en de boetegeweste te verbaetere, is “Baek” ein van'ne eerste besjtumminge. Op 26 september landje ein tweetal DeHavilland “Dragon Rapide”Mk. III van'ne Regeeringsvleegdeens, onger ein vluch oetgeveurdj door de KLM, es eerste civiele toesjtelle op 't veldj. Hiemit waerdje 't vleegveldj officieel geeupendj, in aanwezigheid van alle regionaal besjtuurders, de Directeur-Generaal van Riekswatersjtaot en van'ne PTT en de Directeur van KLM, drs A. Plesman. Mit dees vluch beginne de eerste liendeenste. Veer keer per daag vlooge ze via Eindhove naar Amsterdam en angersom. Gedoerendje 1946 weurdj de klein lochhavent verder oetgeboewdj mit de offisieel benumming van eine stationschef. Terwiel in meert 1946 de Sjtichting Lochhave Zuud-Limburg waas opgerichtj, zakdje 't lochverkeer in. Sjnel hersjtelwerkzaamhede van 't binnenlands waege- en sjpaornet zat de KLM d'r toe aan om häör binnenlands netwerk te hereuverwaege. Waal waerdje t baks'jteine stationsgebuuwke oetgebreidj en baeter gesjiktj gemaaktj veur häör taak. In 1949 waerdje 't relatief tiejelikke karakter van 't vleegveldj aangepaktj door de aanligk van ein 1.200 maeter Noord-Zuid baan, ter vervanging van'ne aaj sjtaolmatte baan, en ein secundair 1.000 maeter baan veur de sjportvleegeriej. Ouch verkreeg de Limburgse Aeroclub toesjtumming om eine hangar te boewe. Ouch waerdje de havedeens oetbesteejdj aan KLM, die in november 1949 definitief mot sjtoppe mit häör activiteite vanaaf 't vleegveldj. 't grootste gedeilte van'ne tied is d'r dan allein maar activiteit van ein kudde sjaop die d'r weurdj gehaaje om 't graas kort te haaje. De toekoms van 't vleegveldj leek onzeker.

In 1951 kwam d'r eine nuuje impuls veur 't vleegveldj, toen 't Ministerie van Oorlog verzoch 't veldj te mooge gebroeke es oorlogsvleegveldj veur de Keuninklikke Lochmach. In 1952 waerdje d'r euvereinsjtumming bereiktj en vriewaal direk waerdje begos aan verbaeteringe van 't vleegveldj. De Noord-Zuud baan waerdje verlenktj toet 1.850 maeter en d'r waerdje eine 13 maeter hoge verkeerstore geboewdj. Aan 't oetgebreidje stationsgeboew waerdje teves bijgeboewe geplaatstj veur de KNMI en'ne Lochverkeers beveiligingsdeens. Dees oetbreijinge zeen net op tied veur de grote NAVO oefening “Coronet” van 1953, wobiej teentalle RAF (Royal Air Force) sjtraoljagers tiedelik op 't vleegveldj gebaseerdj zeen. Later lanje d'r aaf en toe F84G Thunderjets op 't vleegveldj tiedes häör trainingsoefeninge vanaaf vleegbasis Volkel. 't Veldj weurdj veurnamelik gebroektj door de lokaal vleegsjool, ein zjweefclub en inkele sjportvleegers. De Riekslochvaartsjool oet Gilze-Rijen oefentj väöl op 't veldj, ouch dankziej 't leeg sjtart- en lanjingsgeldj. De commerciële lochvaart greujdje enorm nao de oorlog, maar ging veurbiej aan het Limburgse vleegveldj. In 1953 waas d'r zelfs concurrentie vanoet hertje Mestreech, wo ein heliport is opgerich die bevlaoge weurdj door Sikorsky helikopters van 't Belsje SABENA. Maar ouch dees deens is van korte doer en waerdje al sjnel weer gesjtaaktj. In 1956 waerdje overgegange toet de oprichting van de “N.V. Lochhave Zuud-Limburg”, die toet doel haaj 't “ontwikkele en exploitere“ van 't in 1953 officieel aangeweze lochvaartterrein. Dankziej dees maatsjappiej en häör enthousiaste mitwerkers begos h' commercieel lochverkeer 't vleegveldj langzaam te ontdekke.

Vleegveldj Baek

Lets vieftiger jaore begos de lochvaart langzaamaan Vleegveldj Baek te ontdekke, ouch dankziej de tomeloze perseunlikke inzat van'ne in 1957 benoemde Directeur - Havemeister Dio Roxs. Mit 't bezeuke van beurze en lochshows wis de veurmalige Lochmachkapitein ein aantal Ingelse chartermaatsjappieje euver te haole eine tössesjtop in te lasse op 't vleegveldj biej Baek veur häör vluchte nao 't zonnige Italië. Dees vluchte kwame erg in trek biej Britse toeristen vanaaf 1957 en tössesjtops waare erg gewildj biej de passageers es oetsjtepke, om biej te komme van 't vleege in de kabaalvolle propellervleegtuuge. De veer volledige en 't handjvol deiltied mitwerkers haaje d'r al sjnel häör henj aan vol en al sjnel waerdje d'r geïnvesteerdj in materiaal (wiej eine nuuje brandjsjtofwaage) en personeel.

Tradair en Hermes Airways waare de eerste “vaste” zomercharters mit eine tössesjtop in Mestreech. Regelmaotig ginge d'r Britse charteroperators failliet en waerdje häör vleegtuuge euvergenome of verkoch. Daorom waerdje d'r regelmaotig nuuj maatsjappieje verwelkomtj op 't vleegveldj, det gesjtaag oetbreidje in personeel en apparatuur. 't In lochvaartafhanjeling gespecialiseerdje bedrief Rotterdam-Air B.V. sjtardje door 't succes ein dochterongernumming onger de naam Limburg-Air B.V. die de aafhanjeling euvernoom van 't vleegveldj.

Ongertösse waas d'r ein elektrische baanverlichting geïnstalleerdj en waerdje de eerste eige moderne blusauto aangesjaftj. Ouch allerlei anger lochvaartgebonje bedrieve ontdektje 't veldj; Motelmaatsjappiej Holland ging ein restaurant mit motel exploitere en in 1965 waerdje besjlaote om 't nuuj Europees lochverkeersleidingscentrum “Eurocontrol” te vestige op 't vleegveldj. Terwiel 't pas opgerichdje Transavia mit eine DC-3 in vrachoetveuring stardje vanaaf Baek waerdje d'r in 1966 gesjtartj mit 't opnuuj oprichte van ein binnelands netwerk. KLM richdje ein 100% dochter op onger de naam Nederlandse Lochvaart Maatsjappiej N.V. (NLM), det mit van'ne Lochmach gehuurdje F27 Friendships stardje. Op 29 augustus 1966 begos ein deens van Baek via Eindhove nao Sjiphol, ein service die noe waal heel succesvol bleek. De sjportvleegeriej kreeg ein grote impuls mit de organisasie van ein vleegfees op 25 juni. Begin 1967 waerdje d'r eindelik planne gerealiseerdj veur verder oetbreijing. Neet allein waerdje d'r ein vaste lochroute aangeweze richting 't vleegveldj, d'r waerdje eindelik ein “Instrument Landing System” (ILS) geïnstalleerdj en de baanverlichting waerdje verdöbbeldj. Mit dees aanpassinge waas 't ouch meugelik biej minder zich en ’s nachs te sjtarte en lanje op'pe baan. Ouch de baan zelf waerdje onger henj genomme mit de aanligk van ein nuuj toplaog, woveur 't veldj effe toe mos.