Misdener
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
'ne Misdener of misdeender ies 'ne jóng of 'ne volwasse man (acoliet), dae de katholieke preester assisteert bie 't oetveure van de Heilige Mès of Eucharistieviering en 't lof. Ouch hölp 'r bie processies door 't wierouksvaat te drage of te bedene of mèt de belle te rinkele bie 't loupe of aan 't rösaltaor. Aan 't begin van de brónk dreug hae 't processiekruus. Tegewoordig kènne ouch maedsjes misdener were. Tot op 't ing van de 20e iew mochte in väöl kèrke maedsjes of vrouwe geine misdener of 'n ander functie, zoa-es lector, zin. Zie waore neet bevoeg um op 't preesterkoar te kómme.
Vreuger zagte ze ouch waal koarezel tege 'ne misdener.
Take
[bewirk | brón bewèrke]De take van 'ne misdener zint:
- De altaortaofel dèkke. Kennekes mèt water en wien vaerdig zètte.
- Eventueel keertse aansjteke i.[.v. de köster.
- De bel loewe veurdat de deens begint.
- De belle rinkele bie de consecratie
- 't Wierouksvaat drage of bedene
- Sóms: 't binnedrage van 't groat missaal, de Paosjkeerts, de Adventskeerts of 't processiekruus
Kleiing
[bewirk | brón bewèrke]Meistal dreug de misdener 'ne roaje toog, mèt dao-euverheen 'n wiete superplie. Bie begreffenisdeenste ies de toog zjwart. De moderner oetveuring ies 'n kleid in gebroke wiet of beige, albe geneump, mèt dao-op 'ne cingel of kaord.