Li Bai

Van Wikipedia
Gank nao: navigatie, zeuke

Dit artikel is gesjreve in 't Mofers. 't Weurt gewaardeerd óm in dit artikel 't Mofers aan te hauwe of aan te gaeve welk anger dialek gebroek is.


Li Bai.

Li Bai (701 - 762), vreuger meistes Li Po, waas 'ne Sjinesen dichter. Li Bai, biegenaamp d'n Ónstèrveliken Dichter, wuuertj dök same mit Du Fu besjoewdj es eine vanne eminentste dichters oete litteraer gesjiechte van Sjina. Toet op huuj zeen zoea 1100 van zien gedichter bewaardj gebleve. De ieëste euverzèttinge nao 'n wèsterse spraok kómmen oet 1862, doe de Franse markies D'Hervey de Saint-Denys zien Poésies de l'Epoque des Thang oetgoof.

Li Bai laefdje en wirkdje t'n tieje vanne Tang-dynastie. Veure Sjinese kónste waas daen tied tróds väöl stried 'ne waore bleujtied. In Sjina laef Li Bai in väöl vörm en plaatse nag ummer door. Op plaatse wo Li Bai ouch koom of gewóndj haet, zal 'ne Sjinesen toeristegids noeatj naolaote dao-op te wieze. Zien tekste siere väöl aaj en nuuj monumente. Dit alt tróds 't feit det Li Bai in zie wirk döks d'n draak stook mitte hieërsjendje machhöbbers in 't algemein, esouch mitte biebehuuerendje strikte codes. Haezelf woort ouch ummer ómsjreven es 'n alternatief en eigezinnig figuur. Ouch tiejese cultureel revolutie van Mao is Li Bai zie wirk enne persoean zelf geleef gebleve.

Ane Sjinese kinjer waere zien gedichter nag ummer óngerwezen en dao waere toet op huuj nag ummer sjoeale nao 'm verneump. Väöl Sjinese studente zètte zich döks in veur 't wirk van Li Bai inne spraok van häör gaslandj euver te zètte. Bieje muzikaal begeleijing vanne euvernaam van Hongkong in 1997 woort de teks van Li Bai zie gedich euver vrieheid gebroek.

Inne wèsterse cultuur is Li Bai minder bekèndj; al speeltj t'r hie-in toch waal 'n rol. Zoea zatten Ezra Pound en Hans Bethge versjillige teksten en gedichter euver. Oppe euvergezatje tekste van Bethge componeerdje Gustav Mahler 't bekèndje wirk Das Lied von der Erde. David Hartsema sjreef De ballade van Li-Po, door Lenny Kuhr op meziek gezatj en gezóngen op zien ieëste LP "de Troubadour" (1969).

Euver 't verloup van zie laeven en zien herkóms is ummer väöl gespeculeerdj gewaore. Hae wóndje in zien jeug in Sichuan, mer euver zien herkóms wuuertj door sómmige gesuggereerdj det t'r Törks woor en dus neet es Sjinees woort gebaore. Wiejer wiltj 't verhaol det t'r weigerdje staotsexames te doen; die wore doe 'ne wichtige sociale sjakel; zónger dees waas feitelik gein meugelikheid veure sociaal en cultuur leier van Sjina te beklumme. Hae zów aevel waal vanwaenge zien talent ane keizer zeen geprizzenteerdj en bie dem in deens kómme. Zie laeve waas daoróm neet ummer aeve stabiel. Veur in deens/gelieërdje zeendje persoeane wie Li Bai kóste góns en óngenäöj snel aafwussele, wodoor me ouch waal van riekdóm nao ermooj kós gaon. Juus inne periood worin Li Bai laefdje waas dit zeker 't geval.

Volges väöl luuj is det ónnag in zien poëzie trögk te vinje. Döks is dees melancholiek en sómtieds filosofisch, meistes ouch lechelik en gevatj. Verhaole doon de runj det t'r allein gooj gedichter sjreef wen d'r zaat woor. Wiejer steitj Li Bai bekèndj es 'ne laevesgeneter en 'ne netuurleefhöbber.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Li_Bai&oldid=357938"