Leviticus

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.


Leviticus is 't daarde book vaan 't Aajd Testamint en behuurt tot de Pentateuch of Thora. De naom Leviticus liber is 'n latinisering vaan 't Aajdgriekse Λευιτικόν βιβλίον; de Hebreeuwse naom is ויקרא. 't Is e book vaan wètte euver d'n ieredeens en de sameleving, die in de Sinaï-weuste door God aon Mozes weure opgedrage. 't Book gief e good inziech in de streng regele die golde veur seksuelen umgaank die allewijl nog veur problematische situaties zörge binne religieus gemeinsjappe. Binne 't christendom besteit de neiging dit book mier es e Joeds wètbook te besjouwe en zeker neet gaans es wèt aon te numme.

Samevatting[bewirk | brontekst bewerken]

God reveleert Mozes de regele veur offers, en wel brandoffers, graanoffers, vree-offers, zuveringsoffers en herstèloffers (1 t/m 7). Dees regele zien veural veur preesters, meh ouch veur gewoen börgers gemeind. Daan weure Aäron en zien zäöns es preester gewijd (8) en stèlt Mozes d'n offerdeens in (9), boebij God liet zien wie ing zien veursjrifte genome mote weure (10). Dan lègk God oet welke bieste zuver en oonzuver zien (11), en wienie zoeget veur lui gelt (12 t/m 15). In sjapiter 16 lègk God de rituele veur de Groete Verzeundaag (Jom Kippoer) oet.

Hoofstökker 17 t/m 26 bestoon oet regele veur 't volk. Blood is leveskrach, daorum mote geslachte bieste iers oetbloje ietot ze gegete kinne weure (17). D'n Hier verbeet inces, homoseksualiteit en zoöfilie (18) en predik gulheid, oonpartijdegheid en ierlekheid (19). Sjapiter 20 herhaolt nog ins väöl vaan de veursjrifte. Preesters kriege extra streng regele opgelag (21), meh mage wel vaan de heilege offergave ete (22). In 23 weure de fiesdage gegeve. Blasfemie moot gestraf weure mèt steineging (24). De Hier stèlt e sabbatsjaor en jubeljaor in (25) en verbeet de Joede nog ins aofgodsbeelde te make (26). Tenslotte zèt Heer oeterein wie me door offers geloftes kin aofkoupe (27).

Externe link[bewirk | brontekst bewerken]


Biebel: Aajd Testamint - Nui Testamint
Genesis | Exodus | Leviticus | Numeri | Deuteronomium | Jozua | Riechters | Ruth | 1Samuel | 2Samuel | 1Keuninge | 2Keuninge | 1Kronieke | 2Kronieke | Ezra | Nehemia | Esther | Job | Psame | Spräöke | Prediker | Kantieke | Jesaja | Jeremias | Lamentaties | Ezechiël | Daniël | Hosea | Joël | Amos | Obadias | Jonas | Micha | Nahum | Habakuk | Sefania | Haggai | Zacharias | Maleachi
Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Leviticus&oldid=344192"