Léopol II vaan 't Belsj
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Léopol d'n Twiede (Breusel 9 aprèl 1835 - Laken 17 december 1909), voloet op 't Nederlands Leopold Lodewijk Filips Maria Victor van Saksen-Coburg en Gotha en op 't Frans Léopold Louis-Philippe Marie Victor de Saxe-Cobourg-Gotha, waor d'n twiede Keuning vaan de Belzje. Allewel heer d'n twiede zoon waor vaan Keuning Léopol I en Louise Marie vaan Orléans, hiemelde zienen aajdste broor nege maond nao de geboorte.
Léopol waor keuning vaan 17 december 1865 (d'n daag vaan ziene pap zien doed) bis 17 december 1909 (d'n daag vaan zien doed).
Léopol II waor de stiechter, eigeneer en soeverein vaan d'n Oonaofhaankeleke Congostaot (of Congo-Vrijstaot), dee in essentie zie privé-projek waor. Congo woort häöm touwgezag door de Koloniaol Conferentie vaan Berlien. In d'n tied vaan zie keuningsjap goof 't väöl terreur op de Congolese bevolking, boedoor Léopol d'n Twiede zien naolaotsjap hendeg umstreie is. Zoe heet Gent in 2020 beslote um e prominint beeld vaan Léopol II te laote verdwiene oet 't stadsgeziech.