Koos Alberts

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Koos Alberts in 1984, op e benefietkonzèr.

Koos Alberts, pseudoniem vaan Jacobus Johannes Krommenhoek (Amsterdam, 3 fibberwarie 1947 - Enschede, 28 september 2018), waor 'ne Nederlandse zenger vaan 't levesleed. Heer braok rillatief laat door meh heer bleef tot z'nen doed bekind, neet in de lèste plaots doortot heer nao verlamming doorgóng mèt zinge en konzèrs geve.

Alberts stoont in de Amsterdamse traditie vaan 't Jordaanleed. Nao 't veurbeeld vaan Willy Alberti had heer 'nen opera-echtege zaank mèt väöl galm en 'n krietende veurdrach. Heer woort dèks vergeleke mèt zienen tiedgenoet André Hazes.

Biografie[bewirk | brón bewèrke]

Koos Alberts greujde op in de Amsterdamse volkswiek de Jordaan. Heer wèrkde achterein es metseleer en es snackbarhawwer in 't dörp Sint Pancras (gemeinte Langedijk). In zien jóng jaore zong heer veural op fieste en partije en in de kaffee.

Ind 1983 deeg Alberts mèt aon 'nen talentejach in 't Amsterdams bordeel Casa Rosso. Hei leep heer tekssjriever Peter de Wijn en producent Bart van der Post tegen 't lief. Zij dege häöm De Wijn zie nommer "Ik verscheurde je foto" opnumme. Daomèt góng heer laanks diverse platemaotsjappije. Al gaw kraog heer e contrak bij CNR, de maotsjappij vaan Willem van Kooten. In fibberwarie 1984 kaom "Ik verscheurde je foto" oet. Aonvenkelek deeg 't leedsje neet väöl en woort 't veural op de piraotezenders in Noord-Holland gedrejd. Pas wie d'n twiede single "Gisteren heeft zij me verlaten" woort oetgebrach, braok Alberts lendelek door en sjote de twie leedsjes tegeliek de hitparades in. Hei-op brach CNR 'nen daarde single oet, "Waarom ben ik met Kerstmis zo alleen?" Op e zeker memint stoonte alledrei de leedsjes tegeliek in d'n top tien vaan de Nationaol Hitparade - 'n unicum. In de jaore die volgde brach Alberts diverse albums oet, boe-oonder eint mèt Corry Konings.

Op 29 oktober 1987 voor Alberts vaan e konzèr trök nao hoes. Door euververmeujdheid veel heer dee nach achter 't stuur in slaop en raakde vaan de weeg aof. Heer leep 'n dweerslaesie op en raakde vaan oonder verlaamp. Ouch waor ein vaan zien stumban kepot. Ziene nuie single "Eenmaal kom jij terug" waor op dat memint al veerdeg en woort 'ne groete hit.

Nao 'n revalidatie in Enschede besloot heer door te goon es zenger. Al in 1988 kaom 't nui album Het leven gaat door oet. In 1991 brach heer 'n otobiografie oet, Vechten voor geluk, mèt Edward van Liemt es ghostwriter. Nao 1990 kós heer zie groetste succes neet mie evenere, al haolde heer nog dèks besjeie hits. Heer kaom nog dèks op tv in verband mèt zienen handicap. Daomèt wouw heer geld en aondach ginnerere veur 't oonderzeuk nao en de zörg veur dweerslaesie-patiënte. Zoedoende bleef heer bekind, ouch boeten 't typisch levesleed-publiek. Ouch in de jaore tien, wie heer gein nui plate maakde, bleef Alberts optrejje. In 2012 deeg heer mèt in Ali B op volle toeren en in 2018 waor heer gasarties bij drei konzèrs vaan De Toppers in de Johan Cruijff ArenA. Heer woende toen neet mie in Amsterdam, meh in Hierden (gemeinte Harderwijk). In dit dörp steit sinds 2015 e boorsbeeld vaan de zenger.

In 2018 woort bekind tot Alberts blaoskaanker had. Heer woort dao in augustus en september diverse kiere veur geopereerd, meh storf ind september toch in 't hospitaol in Enschede.

Werk[bewirk | brón bewèrke]

Albums[bewirk | brón bewèrke]

  • Koos Alberts (1984)
  • Ik zal je nooit vergeten (1985)
  • Koos Alberts III (1986)
  • Kerst met Koos (1986)
  • Corry & Koos (1987, mèt Corry Konings)
  • Het leven gaat door (1988)
  • Nog vele jaren (1989)
  • Live (1990)
  • Zolang je van geluk kunt dromen (1991)
  • Wat ik je zeggen wil (1993)
  • 10 jaar (1994)
  • Samen terug naar Mokum (1995)
  • Het mooiste in mijn leven (1996)
  • Achter de wolken schijnt de zon (1997)
  • Koos Alberts zingt Hollandse hits (1998)
  • 15 jaar Koos Alberts (1999)
  • Kleine dingen in het leven (2000)
  • Rondje Hollands (2001)
  • Rondje Hollands deel 2 (2002)
  • 20 jaar een legende (2003)
  • Net als vroeger (2005)
  • Even dicht bij jou (2007)
  • Vechten voor geluk (2008)
  • 30 jaar Koos Alberts - Die mooie tijd (2014)
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Koos_Alberts&oldid=429450"