Klassieke rock

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Klassieke rock is de benaoming veur de rockmeziek oet de bleujtied vaan 't genre, zoewie veur meziek dee dit geluid naovolg. Bij klassieke rock gief 't väölal veer muzikante (zenger, leadgitaris, bassis, drummer; dèks zal de zenger ouch slaaggitaris zien), zien de nommers strofisch (couplette, refreine, bridge) en is 't geluid gemaoteg rouw (neet al te väöl distortion, meh wel get). De definitie ligk evels neet gans vas; dèks weure psychedelische en progressief bands ouch op classic rock-zenders gedrejd.

't Subgenre oontstoont in de jaore 1960 in Ingeland, wie bands wie de Rolling Stones späölwijze vaan d'n elektrische blues aon de beatmeziek gónge koppele, e veurbeeld wat direk tot väöl naovolging leide. Aander bands die vaan belaank zien es veurbeeld zien The Who en Status Quo. In de jaore 1970 bleve zoe'n bands wel actief, meh evolueerde de rock in aander vörm (progrock, psychedelica, glamrock, metal en tot slot punk) en kaome ouch gans aander stijle op (funk, disco etc.). Dit maakde 'n awwer weurend publiek laankzaamaon nostalgisch nao de meziek oet hun jäög. Zoe kaom 't ind de jaore 1980 en 1990 ummer mie tot radiozenders die classic rock gónge speule. Dees zenders drejje väöl meziek oet de jaore zesteg en zeveteg, meh ouch wel ins latere meziek dee dao-op liekent.

't Gief versjèllende bands allewijl die hun meziek es klassieke rock bestömpele, wijl ze gaaroet neet oet de klassieke periood komme. Veurbeelde daovaan zien the Black Keys en The White Stripes. Neettemin zulle väöl meziekologe dao 't neet mèt eins zien, umtot zoen bands trök verwieze nao 'n periood mer 't vervolges vertaole nao hunnen eigen tied. Daobij is 't neet zeldzaom tot ouch invlooje vaan aander genres te hure zien. Doortot zoen bands de klassieke rock en aander genres neet zoezier es eige genre gebruke mer ierder es referentie gebruke um bepaolde beteikenis te geve aon hun leedsjes en lyriek, weurt zoen meziek es typisch posmodern gezeen. Wie daan ouch weurt de term klassieke rock door ederein gebruuk um naom te geve aon de "basale rock", dat wil zègke, de rockmeziek die aon de basis stoond veur alle aander rockmeziek. Wat die meziek daan persies inhilt op muzikaol gebeed, es dat al 't geval is, is duuster. Ouch euver 't begin en ind vaan dees periood zal me 't neet ummertouw eins zien. Zoe is in de aofgelaope decennia de veroonderstèlde periood verbreid door versjèllende lui. Wijl in de jaore 1980 de term ziech mesitens riechte tot de meziek vaan bis roontelum 1975, weurt noe al dèks de jaore 80 mètbegrepe of zelfs de Grunge oet de jaore 90. 't Spreek dus veurziech tot de muzikante oet de zoegenaomde klassieke periood vaan de rockmeziek noets in hunnen tied die meziek es "klassiek" bestömpelde - ierder es nui en progressief. Klassieke rock steit dus nog mie es de meiste rockgenres oonlosmakelek in verband mèt 'n conteks vaan meziekhistorie.

't Origineel bezej vaan klassieke rock riech ziech meistens op de periood vaan de rockmeziek die woort gemaak door de babyboom-ginneratie vaan nao de Twiede Wereldoorlog. Wie die ginneratie awwer woort, woort 't publiek vaan 't genre dus ouch awwer. Aon 't begin vaan de jaore 90, wie versjèllende radiostations euver de ganse wereld klassieke rock dreide, waor 't dus publiek dus laank neet mie zoe joonk es wat 't oets waor. Neettemin verjongde dat publiek aon 't begin vaan de 21e iew weer, door de greui vaan de download-cultuur die 't meugelek maakde veur jongere um op 'n gemekeleke meneer weer de meziek vaan de "aw daog" te heroontdekke [1].


Wiki letter w.svg  Dit artikel is e sjtumpke. De kans Wikipedia helpe door 't aan te völle

  1. http://usatoday30.usatoday.com/life/music/news/2004-03-29-classic-rock-kids_x.htm
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Klassieke_rock&oldid=395660"