Kemunie

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Paus Benedictus XVI dreug 'n mès op. Mèt 't memint tot heer de hostie umhoeg hèlt, begint de kemunie.

De kemunie, ouch wel Heilege kemunie, eucharistie of aovendmaal geneump, is e sacremint wat in de mieste christeleke kèrke in einen of aandere vörm veurkump. Kern vaan 't ritueel is tot 't Lèste Aovendmaal weurt naogespäöld: de veurgenger deilt broed en wien oet aon de geluivege.

In 't roems-katholicisme en de diverse vörm vaan oesterse orthodoxie steit de kemunie centraol. 't Is e verpliech oonderdeil vaan eder mès; eint vaan de wienege ouch wat zoonder oetzundering in eder mès veurkump. Kathelieke geluive tot de mèswien en de hostie, vaanaof 't memint tot de preester ze consacreert, reëel 't blood en 't lief vaan Zjezeke zien (de transsubstantiatielier). Dit gief de kemunie 'n oetgesproke mystiek karakter. De kemunie is ein vaan de drei initiatiesacreminte, neven 't duipsel en 't vörmsel. Pas bij de ierste kemunie maak 'ne geluivege volweerdeg deil oet vaan de Kèrk. Allein al heium weurt aon de ierste kemunie oonder kathelieke vaanajds groete weerde gehech.

Bij de mieste prottestante oontbrik 't aovendmaal in einen of aandere vörm ouch neet; 't is neve d'n duip 't insegs sacremint wat de Rifformatie heet euverleef. 't Belaank is wel minder groet es bij de kathelieke: in prottestantse deenste steit in 't gemein de preek centraol. De lutheraone hechte nog groete weerde aon de hostie en de wien (ze hantere de consubstantiatielier, die väöl vaan de mystiek in stand hèlt), bij de calviniste evels gelt 't aovendmaol es zuver symbolisch. Naovenant zien de eise boe broed en wien aon mote voldoen dao väöl minder streng; 't deilnumme vaan neet- of aandersgeluivege ligk dao ouch neet zoe geveuleg.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Kemunie&oldid=442297"