KV D'n Uul van den Grauwert

Van Wikipedia

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


KV D'n Uul van den Grauwert is de vastelaovesverein van 't stedje Mofert. De verein is opgerich gewaoren in 't jaor 1906. De verein guuef eder jaor de vastelaovesgezèt oet worin de aktiviteiten en 't nuuts vanne Moferter vastelaovendj waere vermeldj, esouch joeks wuuertj gemaak euver gebeurtenis van 't aafgeloupe jaor en worin bekandje Moferter dörpsfiguren 'nen hak aan waere gezatj.

't Logo vanne verein besteit oet 't waope van Mofert inne midde mit links en rechs 'nen uul d'rnaeve, 'ne steek d'rbaoven en e lintj mit 't jaor van oprichting d'rónger.

D'n Uul van den Grauwert hèltj alsjaore versjillendje evenemente. Saer 1983 is 't Zate Hermeniekes Festival, informeel ouch waal 't Hermeniekestreffe, e väöl-bezochte gebeure det wuuertj georganiseerdj in samewirking mitte joekskepel Eine Ôngerein. Wiejer is eder jaor de Moferter Aovendj vaste prik, wobie artieste van binnen en boete Mofert de kans kriegen op te traeje. Ouch wuuertj op vastelaoveszónjig in samewirkinge mitte parochie H. Catharina 'n vastelaovesmis gehajen inne kirk; dees mis wuuertj gans in 't Mofers plat gehaje. Aansloetendj oppe mins wuuertj ummer door 't prinsepaar en 't jeugprinsepaar de vastelaovesvlag oetgehange. Saer 2008 gebeurtj det op 't kestieël, wo ouch daonao de jäörlikse sleuteleuverdrach plaatsvindj. De prins van det jaor krieg den de sleutel van 't "Drosamb Grauwert" vannen drosserd. d'n Optoch vindj plaats op vastelaovesmaondig en oppen dinsdig duit me traditioneel óm 11 euver 11 saoves d'n Uul verbranje veure vastelaovendj aaf te sloete. Anger evenemente zeen 't Prinsebal enne Prinsereceptie.

Boeten 't sezoen organiseertj de verein onnag anger evenemente, worónger de kersmert. In 't verleje haet de verein ouch 't Mofers Dictee gesponserdj.

De opbringste van 't Moferter drenkske Ulezeiver zeen te góns vannen Uul van den Grauwert.

Los vanne KV D'n Uul van den Grauwert steit 't gruupke vanne Aad Prinse van Mofert.

Externe link[bewirk | brón bewèrke]