Jolande Sap

Van Wikipedia
Naar navigatie springen Naar zoeken springen
Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Venloos, as te dit dialek sjpriks.

Jolande Sap

Johanna Catharina Maria (Jolande) Sap (Venlo, 22 mei 1963) is ein Nederlandjse econome, politica en saer september 2008 lid van de Tweëde Kamer veur de poletieke partiej GreunLènks. Op 17 december 2010 woort zie, nao ein unaniem aordeil van de fractie van häör partiej, de opvolger van de truktraejende Femke Halsema es fractieveurzitter in de Tweëde Kamer.

Laevesloup[bewirk | brón bewèrke]

Sap sjtudeerde tösje 1981 en 1989 economie aan de Kathelieke Universiteit Brabant en sjpecialiseerde zich in poletieke economie en filosofie. Tösje 1985 en 1988 waas zie sjtudentassistent en coördinator biej de leërgank Óntwikkelingsproblematiek.

Vervolges waas zie drie jaor óngerzeuker verbónje aan de Universiteit van Amsterdam. Zie deeg óngerzeuk nao 't versjil in loan tösje mansluuj en vrouwluuj. In 1992 woort zie weitesjappelik mètwirker van de Emancipatieraod. Sap waas initiatiefnumsjter van Out of the Margin, tweë internationale conferenties euver feministische economie in 1992 en 1998. Dit leijde tot de publecatie van 't book Out of the Margin. Feminist Perspectives on Economics, wovan zie same mèt Susan Feiner redacteur waas. Saer 1993 is zie actief bènne GreunLènks, es lid van de economische commissie.

In 1996 góng zie wirke op 't ministerie van Sociaal Zake en Wirkgelaegeheid, wo zie ónger angere de amtelikke top adviseerde en zich bezigheel mèt emancipatie- en laevesloupbeleijd mer ouch mèt loan- en inkómmensvraogsjtökke en pensioene.

In 2003 gong ze weg biej 't ministerie en woort zie directeur van LEEFtijd (destieds nog LBL expertise centrum laeftijd en maatsjappiej). Ónger häör leijing góng LEEFtijd zich bezighawwe mèt meë thema's, mèt name mèt vergriezing en laevesloupbeleijd. In 2006 sjreef Sap mit aan 't verkezingsprogram van GreunLènks. Zie sjtóng op plaatsj ach op de verkezingelies veur de Tweëde Kamer. GreunLènks haolde aevel mer zeve zetele. In 2007 woort zie lid van 't begeleijingspanel beginsele van de commissie-Van Ojik, die in 2008 ein nuuj beginselprogram veur GreunLènks zal sjrieve. In 2008 góng zie weg biej LEEFtijd en góng sabbatical.

Sap woort op 2 september 2008 lid van de Tweëde Kamer veur häör partiej es tiedelikke vervanging waeges zjwangersjapsverlof van Mariko Peters. Wiej Wijnand Duyvendak de daag dao-op aaftrooj, woort zie beneump tot ziene opvolger.

Sap is sjpecialist van de fractie op 't gebeed van sociaal-economische vraogsjtökke. Es kamerlid beheërt zie de portefeuilles Financië en Rieksoetgave. Ouch 't aow-dossier vilt ónger häör portefeuille, wo-ónger 't vraogsjtök langer doorwirke.

Biej de verkezing bèste politicus van 't jaor 2009, georganiseerd door 't NOS Radio 1-Journaal, woort Jolande Sap gekaoze es politiek talent van 't jaor. Ziej is op dit memènt Financieel woordveurder en woordveurder AOW en pensioene van de GreunLènks fractie.[1]
Van juni 2009 pes mei 2010 waas zie lid van de kemmissie de Wit die ónderzeuk deeg nao de financiële crisis wo Nederlandj in 2007/2008 in mitgetrokke woort.

Op 17 december 2010 woort bekènd dat Sap Femke Halsema opvolg es fractieveurzitter van GreunLènks.

Externe links[bewirk | brón bewèrke]

Commons
In de categorie Jolande Sap van Wikimedia Commons zeen media gerelateerd aan dit óngerwerp te vènje

Referenties[bewirk | brón bewèrke]

  1. Portefeuilleverdeiling Tweëde Kamerfractie op GreunLènks.nl
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Jolande_Sap&oldid=349409"