Johnny Depp

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Johnny Depp

Johnny Depp op de set vaan de musical Edward Scissorhands, e detail vaan 't origineel.
Achtergrondjinfermasie
Volledige naam John Christopher (Johnny) Depp II
Gebore Owensboro (Kentucky)
9 juni 1963
Beroep(e) Acteur

John Christopher (Johnny) Depp II (Owensboro (Kentucky), 9 juni 1963) is 'ne Amerikaansen acteur. Heer woent allewijl in Paries, Los Angeles, Zuid-Fraankriek en Ingeland, heet 'n ziewierdeg jacht en e eige eiland in de Cariben.

Depp späölde in mie es veerteg films en veur tillevisie in de politieserie 21 Jump Street.

Zie leve[bewirk | brón bewèrke]

Depp weurt gebore es zoon vaan steibouwkundege John Christopher Depp en serveerster en hoesvrouw Betty Sue Palmer. Zien mam, vaan wee heer 'ne tattoo op ziene erm heet, adoreert heer tot op de daag vaan vandaog. Heer heet 'n awwer broor (Danny) en twie awwer zusters (Christy en Debby). Ouch al is heer in Kentucky gebore, heer greujde 't groetste deil vaan zien jäög op in Miramar, in Florida, boe 't gezin nao touw verhuisde toen ziene bompa storf. Door de ruizing thoes woort Depp veural opgevoed door zien mam. Zien awwers gónge oeterein toen heer vieftien jaor aajt waor.

Op zien 16de stopte Depp mèt sjoal um ziech volledeg aon meziek te wije. Mèt 'n stèl vrun trok Depp door Florida, es gitaris in 't bandje The Flame. Naotot ze 't bandje umgedoup hadde tot The Kids, woorte zie gevraog es openingsact vaan de tour vaan Iggy Pop. De band góng zien gelök bepreuve in Los Angeles en Depp zörgde dao veur zien levensoonderhaajt door 't telefonisch verkoupe vaan balpenne. Al snèl veel de band oeterein. Door gebrek aen cent góng heer actere, mer heer rappeleert ziech de periood mèt de band nog altied es de sjoenste tied vaan zie leve. Zoe späölt heer zelf gitaar in Chocolat en in Sweeney Todd zingk heer. Wijer heet heer opnames gemaakt mèt Oasis en op tillevisie opgetroje mèt Shane McGowan en Iggy Pop. Veur de film 'Once upon a time in Mexico' sjreef heer zien eige thema 'Sands Theme'.

In Los Angeles lierde Depp de visagiste Lori Anne Allison kènne, mèt wee heer vaan 1983 tot 1985 getrouwd waor. Allison introduceerde Depp bij Nicolas Cage. Allison euvertuigde Depp devaan tot actere wel get veur häöm waor en heelp häöm aon 'ne agent in de film- en televisiewereld. Depp kreeg de hoofrol in A Nightmare on Elm Street, ondanks zien gebrek aon ervaring. Daonao maakde heer inkel tienerfilms zoe es Private Resort. Vrijwel alle films nao A Nightmare on Elm Street flopte.

Ziene groeten doorbraak waor de serie 21 Jump Street, boe heer de rol späölde vaan Tom Hanson, 'ne undercover deender. Mèt 21 Jump Street kraog heer de status vaan tieneridool.

't Waor e imago boe Depp neet op zaot te wachte. Heer waor opgeluuch wie heer in 't veerde seizoen kós stoppe. Zonger Depp bleek de serie neet mie te loupe en nao nog e seizoen veel 't dook.

Heer besloot veurtaon zien rolle bedachzaom oet te zeuke, zoonder in ierste instantie op de cent te lètte.

Iech wèl neet 85 zien, en kleinkinder höbbe die zègke, 'Bah! Bompa heet dom dinger gedoon'.
Iech wèl lever tot ze zègke, Wow, maan, diech bis döl!
Depp euver zien diversiteit aon 'apaarte' filmrolle, Time Magazine, 15 maart 2004

Zien ierste twie groete filmrolle kreeg Depp in 1990. In dat jaor späölde heer in de jaore '50-parodie Cry Baby, boe in heer de ruige nozem Wade Walker vertolkte, mer heer braok veural door mèt de fantasyfilm Edward Scissorhands, dee heer maakte mèt Tim Burton. 't Is de start vaan 'n lang carrière mèt 'n divers aontal films. De film Arizona Dream oet deen tied woort veural 'n culthit in Fraankriek.

Johnny Depp op de première van Pirates of the Caribbean: At Worlds End, juli 2007.

'ne Nuie sterstatus krijg heer wie heer beslut 'ne piraat te goon speule. Aonvenkelek woort heer neet serieus genome: 't piratengenre waor al tientalle jaore "doed". Mer umtot heer (aonvenkelek tot groete sjrik vaan Disney) de piratekapitein Jack Sparrow e hiel eige geziech wis te geve, woort Pirates of the Caribbean: The Curse of the Black Pearl oonverwach de groete hit vaan 2003 en kraog Depp 'n Oscarnominatie. In 2006 kaom Pirates of the Caribbean: Dead Man's Chest oet en in 2007 Pirates of the Caribbean: At World's End. Mierdere fans zien Depp daan ouch es veurbeeld vaan iemes dee oondaanks tegeslaag trouw bleef aon ziechzelf en ziech neet leet opjaoge door 't groete geld of "de ongesjreve regels vaan Hollywood", en oeteindelek wereldwied erkint woort es ein vaan de populairste acteurs vaan 't momint.

In 2008 vervóng heer oonverwach de plotseling gestorve Heath Ledger in The Imaginarium of Doctor Parnassus ; weier naom heer in 't veurjaor en de vreuge zomer vaan 2008 Public Enemies op, hei in späölt heer de rol vaan de beruchte bankrover John Dillinger. In 2010 versjijnt Tim Burton's Alice In Wonderland, boe in heer de Hoodmaker vertoent. De laank verwachte verfilming vaan Hunter S. Thompson's "Rum Diary" is in 2009 in veurbereiding gegaange.

Prijze en nominaties[bewirk | brón bewèrke]

  • Golden Globe-nominatie, (1990), Bèste Acteur in 'ne musical of komedie (Edward Scissorhands)
  • Golden Globe-nominatie, (1993), Bèste Acteur in 'ne musical of komedie (Benny & Joon)
  • Golden Globe-nominatie, (1994), Bèste Acteur in 'ne musical of komedie (Ed Wood)
  • César, (Frans), (1999), 'ne oeuvre-ierepries
  • Golden Globe-nominatie, (2004), Bèste Acteur in 'n musical of komedie (Pirates of the Caribbean: The Curse of the Black Pearl)
  • BAFTA-nominatie, (2004), Bèste Acteur (hoofrol) - (Pirates of the Caribbean: The Curse of the Black Pearl)
  • Oscar-nominatie, (2004), Bèste Acteur in 'ne film - (Pirates of the Caribbean: The Curse of the Black Pearl)
  • SAG Award, (2004), Bèste Acteur (hoofrol) (Pirates of the Caribbean: The Curse of the Black Pearl)
  • Golden Globe-nominatie, (2005), Bèste Acteur in e drama - (Finding Neverland)
  • BAFTA-nominatie, (2005), Bèste Acteur (hoofrol) - (Finding Neverland)
  • Academy Award-nominatie, (2005), Bèste Acteur in 'ne film - (Finding Neverland)
  • Golden Globe-nominatie, (2006), Bèste Acteur in 'ne musical of komedie (Charlie and the Chocolate Factory)
  • Golden Globe-nominatie, (2007), Bèste Acteur in 'n musical of komedie (Pirates of the Caribbean: Dead Man's Chest)
  • Golden Globe, (2008), Bèste Acteur in 'ne musical of komedie (Sweeney Todd)
  • Oscar-nominatie, (2008), Bèste Acteur in 'ne film (Sweeney Todd)
  • MTV Movie Awards (2008), Bèste savojaar (Jack Sparrow) en Sjiekste slechterik (Sweeney Todd)

Filmografie[bewirk | brón bewèrke]

Trivia[bewirk | brón bewèrke]

  • Depp heeft deils Cherokee-blood, mèt naome vaan moojerskant. Zien euvergroetmam Minnie waor 'n volbloed Cherokee-indiaonse. Nao eigen zègke bezit heer ouch Iers en Duits blood...
  • Al op jonge leeftied leet heer zien ierste tattoo zètte: de kop vaan 'ne Cherokee (es eerbetoen aon ziene bompa). Ziene lèste tattoo leet heer in de zomer vaan 2008 zètte en bevat de teks "Silence, Exile, Cunning" ('ne quote vaan James Joyce).
Commons
Commons
In de categorie Johnny Depp van Wikimedia Commons zeen media gerelateerd aan dit óngerwerp te vènje
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Johnny_Depp&oldid=434347"