John Bröcheler

Van Wikipedia

Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.


John Bröcheler (Vols, 21 fibberwarie 1945) is 'ne Nederlandse bas-bariton operazenger.

Biografie[bewirk | brón bewèrke]

Bröcheler sjtudeerde aan 't Conservatorium Mestreech biej Leo Ketelaars en later in Paries biej Pierre Bernac. In 1969 behaolde hae de eësjte pries biej 't Lanjelijk Concour van Nederlandse Vocaliste in Hertogenbosch.

Op 8 juni 1970 sjlaagde Bröcheler mèt drie tieëne veur vocalises, aria's en partieje, en veur liedere aan 't Mesjtreechs Conservatorium veur solozank akte C. Hae kreeg 'n aansjtèlling es lieëraar solozank aan de Sjtedelike Mezieksjoal in Mesjtreeh.

In maart 1972 woort häöm de Prix d'Excellence toegekènd es bekroaning op zien topprestaties aan 't Mesjtreechs Conservatorium. In 1974 debuteerde hae, mèt völ succes, biej de Berliner Festwochen (Die Erprobung des Petros Hebraicus - Henry Pousseur). Nao aanleiding hievan neuëdigde Maurizio Kagel häöm oet veur de waereldpremières van Mare Nostrum (Berlien, Paries, Avignon) en Die Umkehrung Amerika's (Prix Italia). Intendant Hans de Roo (Nederlandse Opera Sjtichting) hèj 'n belcantorol (Maria Stuarda - Gaetano Donizetti) veur de 'avantgardist' in petto. Naeve ónger angere Joan Sutherland (titelrol) zóng hae de rol van de biechvader Talbot.

't Jaor 1977 woort 't begin van 'n glansrieke operacarrière. Nao zien American Debut in San Diego (Verdi's Falstaff, regie: Tito Capobianco), volgde New York City Opera (Menotti's - La Loca mèt Beverly Sills), Don Giovanni en Verdi's Nabucco mèt Grace Bumbry es Abigaile). Via Los Angeles en Toronto (Ambroise Thomas - Hamlet mèt Joan Sutherland es Ophelia), boewde hae aan zien zangersloupbaan.

Bröcheler zien eësjte lp mèt ónger angere Schumann's Dichterliebe (Tan Crone op de piano), woort bekroand mèt de Preis der Deutschen Schallplatten Kritik. Nao aanleiding hievan woort hae euverlaje mèt Europese opera- en concertaanbejinge.

Heël recentelik belaefde hae triomfe ónger leiding van Edo de Waart mèt 't Hong Kong Philharmonic Orchestra, in 'n concertante-oetveuring van Salomé (Richard Strauss).

Óngersjeijing[bewirk | brón bewèrke]

Op 16 mei 2005 haet börgemeister mr. W. Geraedts van de gemeinte Gulpe-Wittem in 't Theater aan 't Vriethof in Mesjtreech, names de H.M. de Keuningin, John Bröcheler beneump tot Ridder in de Orde van de Nederlandse Leeuw.

Nao zien carrière[bewirk | brón bewèrke]

Nao 'n succesvol carrière van ruum 40 jaor geit de operazanger 't röstiger aan doon. John wilt de kómende jaoreen waal nog hoesconcerte verzörge in ziene sjtudio en woonhoes in Eperheide. Ouch loupende projecte waere afgemaak, zoa-es 'n tv-serie van programmamaker Maurice Nijsten wo-in Bröcheler door de ganse provincie löp en zunk.

Book[bewirk | brón bewèrke]

Brónne[bewirk | brón bewèrke]

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=John_Bröcheler&oldid=456835"