Jean Canisius

Van Wikipedia
Gank nao: navigatie, zeuke

Dit artikel is gesjreve in 't Sjènnes. 't Weurt gewaardeerd óm in dit artikel 't Sjènnes aan te hauwe of aan te gaeve welk anger dialek gebroek is.


'n pötje sjroap van Canisius

Jean Canisius waor eine fruitteler oet Sjènne dae in 1903 op 't idee kaom om van eppel die hae neet kosj verkoupe sjroap te sjtaoke. Hae begós dan ouch in zien hoes in Nagelbek mèt ein klein sjroapsjtaokes. Al gauw makde hae mae sjroap dan wie 'r eppel en paere verkoch, en gruijde 't sjtaokes mèt 't jaor.

Kirkklokke[bewirk | brontekst bewerken]

Omdat Canisius noe ein van de groatste sjroapsjtaokesj waor in Limburg, how 'r ouch aanzeen in g'n dörp. Naodat de Pruse in d'n aorlog euveral in 't landj de klokke oet de kirke howwe geklauwd om dao sjeetgewaere en anger aorlogstuig van te make, hele de luuj van Sjènne nao d'n aorlog ein geldjinzamelaksie veur nuuj klokke. Wie de kollektante bie Canisius a g'n deur sjtónge om häöm ouch veur ein biedrage te vraoge vroog 'r "Jonge wat koste die dènger?" En wie 'm vertèld woort dat dees klokke ongevaer ƒ 15000 ginge koste, zag 'r "Jonge gaot heivisj, ich betaal die dènger". Canisius heel woord, en koch drie groate klokke van respectievelik 1235, 735 en 515 kilo, en goof twae klokke eine naam: "Jean" en "Josephina" nao de naam van zien zuster. . Naeve dees klokke deije ze auch ein drieklokke carillon cadeau mèt klokke van 220, 155 en 110 kilo sjwaor. Dit grepke kostte Canisius de leeve som van ƒ 16000,- Huuj d'n daag hange dees klokke nog ömmer in de kirktaore.Sjang Canisius waor auch eine van de iesjte prinse van de Sjennese vasteloavend. Dit vasteloavendviere haet hae waarschienlik geliert wie hae op 't duutsj ziene sjroap ging verkaupe. Hae waor dan auch de iesjte Prins in Sjenne. Dae vasteloavend is neet lang blieve bejstoan.

Sjroap[bewirk | brontekst bewerken]

Óngertösje woort op vuuël plaatse in Limburg sjroap gesjtaok. In Baek loog beveurbeeld de Sicof en in Pöth de sjroapfabriek van Solberg. Meh de fabriek in Nagelbaek woort vuuëls te klein, en daorom woort 'r ein nuuj geboewd aan d'n euverkantj van 't sjpaor. In 1956 woort de fabriek, die noe nog ummer in gebroek is geuëpend. Ongertösje waor ei familielid van Sjang Canisius getrouwd met eine sjnaak van Henssen, ein anger familie oet Sjènne mèt aanzeen, wodoor de naam van de fabriek verangerde in Canisius-Henssen. (Oet resjpek veur Jean bleef ziene naam es aesjte veuraan sjtaon.) Wie de sjroapfabriek in 2003 100 jaor besjtóng kreeg de sjroapfabriek van Keuningin Beatrix de titel Hofleveranseer. En same mèt de Alfa Broewerie is dit 't tweëde bedrief in Sjènne dae dizze titel haet.

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Jean_Canisius&oldid=349352"