Integumentair systeem

Van Wikipedia

Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.


'n Dwarsdoorsjneej van de hoed.

't Integumentair systeem of integumentum (van 't Letien integere "besjurme, bedèkke") is 't orgaansysteem det 't lief besjurmp taege sjaaj en besjteit oet de hoed en alles det dao biehingk, wie haor, vèl, sjöbbe, klere (worónger talgklere en zjweitklere), vaere en naegel. 't Integumentair systeem haet oetereinloupende functies. 't Kan besjurme taege water, kaaj of hits, krenkdeverwèkkers wie bacterieje en virusse, zónverbranjing en oetdreuging, hoog drök taegehaje en de deper weefsele besjurme; wiejer kan 't aafvalsjtoffe aafsjeie, de temperatuur regulere en bevinje zich de sensorische receptore hie-in die pien, tasgeveul, drök en temperatuur opmirke. Bie miense zörg 't integumentair systeem ouch veur de opnaam van vitamine D.

't Systeem is 't grótste orgaansysteem. Bie miense sjteit 't veur róndj de 16% van 't totaal lichaamsgewich en dèk 't 1,5 tót 2 m² aan oppervlakde. 't Sjèdj van, besjurmp taege en informeert 't deer euver zien ómgaeving. Kleinlievige óngewirvelde in aquatisch of sjtendig vochtig klimaat aome mit de boeteste laog van 't systeem. Dit sjtofwusselingssysteem, wo 't gaas sumpelewaeg in en oet van 't interstitium diffuseert hèt integumentair sjtofwusseling.