Ieësele

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

Ieësele (Nederlandjs: Eerselen) is 'n agrarisch gebied t'n zuje van 't stedje Mofert. 't Gebied besteit veurnamelik oet weilandj, en in minder maote ouch akkerlenj, en woort vanaaf zoeaget 1890 gebroek es gemeinsjappelike wei. De naam "Ieësele" gebroek me sónger lidwaord en wen me zich hie bevindj, den zaet me det me "op Ieësele" is.

Ieëselen is van ieëre oet e stoefduungebied. Vreuger haet hie meugelikerwies e deil vanne Roer gestruimp, dae den vanoet 't Sweeltje, door 't Brook, Ieëselen en 't Groeatbrook gans via St. Joeas nao Brachterbaek struimdje en tösse Brach en Lin, wo noe de Krómbaek ligk, oetmundje inne Maas. 't Vörmp 'n óngerdeil van 't Vlaotbaekdaal.

Ligking en indeiling

Strik genómme strèk Ieësele zich oet vanaaf de Pötbaek (Helderbaek) in 't wèste toetane Baenj bie oppe Zandj in 't oeaste, en vanne Baentjes aan 't Vlaot in 't naorde toet wo de Baenj enne Helderbaek zich kruutse. Ieësele wuuertj doorkruuts door drie leigraefkes die vanaaf de Zandj gezeen waere genómmerdj: 't Ieëste Luiterke, 't Twieëdje Luiterke en 't Derdje Luiterke.

't Ieëste stök van Ieësele, gans oeastelik, tösse de Baenj en 't Ieëste Luiterke, hètj in 't naorde de Haove, en in 't zuje Euver Raorwinge. Hie bevindj zich allewiel de sporthal, de basissjoeal, de tennisveljer, e groeat voetbalveldj enne hèlf vanne sjaatsviever. 't Ieëste Luiterke is veure aanlag van deze viever ómgelag. 't Twieëdje stök (gans ouch waal Boortmoor geneump), tössen 't Ieëste Luiterke en 't Twieëdje Luiterke, is gans opgedeildj in versjillige stökker: oppe hèlf aan 't Ieëste Luiterke hoot 't ieëste perceel vanoet 't naorde De Zump - hie ligk noe e groeat voetbalveldj - 't perceel dao-ónger hoot De Voel Koele - hie ligk noe e klei voetbalveldj en e deil vanne sjaatsviever; 't bäövelste stök aan 't Twieëdje Luiterke hètj d'n (Echte) Boortmoor (Nederlandjs: Boordmool); 't ungelste stök tösse 't Ieëste en 't Twieëdje Luiterke, wo dees zich aafbuge nao 't zuudwèste, hètj Óngerieësele. De twieë hèlfte van dit gebied waere gesplits dore Ieëselebaek, 'ne kleine, struimendje leigraaf. 't Stök tössen 't Twieëdje en 't Derdje Luiterke (roewewaeg tösse d'n Ieëselewaeg ennen Ieëseleziewaeg) neump me waal 'ns Wensbergermoor; ouch hie löp dore midde 'ne leigraaf. t'n Wèste vanne Derdje Leigraaf ligke nag e deil percele tösse d'n Ieëseleziewaeg ennen Ieëseledwaarswaeg, wodoor e deil leigrave löp; dees heiten Achterieësele; gans in 't zuje hievan loog ieëre 't Koekoeksbuske. t'n Wèste vanne leigraaf anen Ieëseledwaarswaeg ligk 't litste stök van Ieësele; dit hètj de Koewei en det stök gróndj löp door toetane Pötbaek. Taengeneuvere Koewei ligk 't veurmaolig gehuch Wensberg.

Gesjiechte

't Twieëdje Luiterke droog ieëre de naam van 't veldj wo 't noe aan grens: Boortmoor. Dit waas in vreuger tieje de zujelikste grens vanne verdaejigingswirke van 't kestieël. Allewiel gebroek me de benaming onnawel veure plaats wo 't Twieëdje Luiterke oetkump in 't Vlaot.

't Gebied vanne Voel Koele waas vreuger wo me törf dieëj winne; dao kump denouch de veldjnaam vanaaf.

Op aaj kaarte steit 't gebied van Ieësele döks vermeldj es Broek. Dees benaming is aevel neet terech; in Mofert haet me 't gebied noeatj zoea geneump. Boetedet sleit de naam "'t Brook" oppe veljer anen angere kantj van 't dörp. Op nujer kaarte (vanaaf zoeaget de jaore '60) staon de name waal tegooj vermeldj.

Brónne

• Bakkes, Pierre. Mofers Waordebook (2007).