Hèllemed

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Helmond is 'n stad en gemeinte in zuidoostelek Noord-Braobant, tösse Eindhove, Wiert en Venroj. De gemeinte heet 'n oppervlak vaan 54,57 km² en had op 1 juni 2005 'n populatie vaan 85.571 inwuners. Helmond huurt bij 't Kaderwètgebeed SRE en ligk aon de Braobantse Aa en de Zuid-Willemsvaart. Binne de gemeinte ligke ouch de kèrne Mierlo-Hout en Stiphout.

Stadsfuncties

In 't verleie waor Helmond 'n veurnaom textielstad. In de jaore zesteg is dees industrie verlaore gegoon en sinds deen tied kamp Helmond mèt probleme vaan sjomaasj en verpaupering.

Helmond heet veer staties aon de spoorweeg vaan Eindhove nao Venlo.

Stadsbeeld

Dit woort jaorelaank gedómmeneerd door febrikke, ouch naotot die leeg kaome te stoon. Helmond heet rillatief weineg aw gebouwe. Bezeenswierdeg zien 't Kestiel Helmond en de Sint-Lambertuskèrk, wie ouch moderner arsjitectuur wie Boscotondo en de kubusweuninge vaan Piet Blom (die me ouch in Rotterdam vint). In de umgeving vint me de plas Berkedonk.

Historie

Helmond weurt veur 't iers geneump in 'n bul vaan Paus Alexander III (1159-1181), en krijg stadsrechte in of roond 1232. Daonao slumert 't tot in de negentiende iew de textielindustrie opkump.