Hebe (planetoïed)
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
Hebe (officieel: 6 Hebe) is 'n planetoïed oete planetoïdereem van 't zónstèlsel. Ze bevindj zich tösse de bane vanne planete Mars en Jupiter. Hebe haet 'nen ónregelmaesige vorm mit 'ne gemiddeldjen diamaeter van 186 km. De baan rónjelómme zón is sterk ellipsvörmig ennen aafstandj toete zón kan wusjele tösse de 2,914 en 1,937 astronomische einheje.
Vanaaf de aerd gezeen is Hebe 't op veer nao klaorste objek inne planetoïdereem, nao 4 Vesta, 1 Ceres, 7 Iris en 2 Pallas. Ze kan tiejes gunstige opposities 'n sjienbaar klaorheid van +7,5 bereike (klaorder es de planeet Neptunus, zoeadet ze den zelfs mit 'ne goje verrekieker zichbaar is.
Hebe woort op 1 julie 1847 óntdèk doren Duutsjen ammetäör-sterrekóndige Karl Ludwig Hencke. Hencke haw twieë jaor daoveur ouch de planetoïed 5 Astraea óntdèk. Veurdet Hencke zien óntdèkkinge haw gedaon noom me-n aan det 's meh veer planetoïde tösse Mars en Jupiter wore; de vónjs vanne nuuj planetoïde zörgdje veur 'n zeuktoch nao mieë van dees. Es gevolg daovan waas binne tieën jaor nao de óntdèkking van Hebe 't aantaal aan bekandje planetoïde bao vertieënveljig. Allewiel zeen hóngerddoezjende planetoïde bekandj.
De naam Hebe woort bedach dore wiskóndige Carl Friedrich Gauss. Hebe is inne Griekse mythologie de godin vanne jeug en 'n dochter van Zeus en Hera.