Hertaanval
Dit artikel is gesjreve (of begós) in 't Sint-Joasters. Laes hie wie v'r mit de versjillende saorte Limburgs ómgaon.
 | Lèt good op 't veurbehawd bie medische informatie. Gank bie gezóndjheidsklachte nao 'nen hoesdokter. |
'nen Hertaanval, hertinfark, attak of myocardinfark is 't aafstèrve van e deil van de hertspier door 'n óngerbraeking in de bloodtoeveur door de kransslaagaore. Dit kan leie tót (sóms op kórten termien laevesbedreigendje) ritmestuèrnisse en tót hertfale door ónvóldeundje pómpwirking van 't hert.
De patiënt veultj in typische vel 'n zwaor, drökkendje pien middenachter 't bórsbein, sóms oetstraolendj nao de kake of de sjóljer, veural de linkse. Dit geit döks gepaardj mit zweite, bleikheid en doadssjrump. In verbandj mit de kans op ritmestuèrnisse is 't van belank zoa snel meugelik in e krankenhoes te waere opgenómme.
Es ritmestuèrnisse oetblieve of mit succes kinne waere bestreje en 't spierverluus neet te groat is zoadet de pómpfónksje neet zwaor wuèrtj aangetas vindj genaezing plaats in de loup van inkel waeke.
Risicofactore veur 't optraeje van 'nen hertaanval zint rouke, diabetes, inaktiviteit, alcoholisme, hoag blooddrök, te hoag cholesterol, 't mennelik geslech, aojerdóm en genetische factore.