Harie Meijers
- Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Mestreechs, es te dit dialek sjpriks.
Harie Meijers (Mesjtreech, 5 december 1879 – Mesjtreech, 14 april 1928) waas eine Nederlands fitserenner.
Biografie
[bewirk | brón bewèrke]Meijers maakde op 17-jaorige laeftied in 1897 zien debuut es profesjeneel fitserenner en bleef dit, mèt ein óngerbraeking in 't jaor 1901, pès 1904.
Hae waas eine zoon van 'ne welgesjtèlde kaffeehanjelaer aan 't Vriethof in Mesjtreech. Es sjtraotjóng oefende hae op de kasseije van de Boschsjtraot en woort hiebiej oetgeloerd door ziene vrundj en troewe supporter, de later bekènde Mesjtreechse sjriever Fons Olterdissen. Dae kroog róndj 1900 van Meijers 'ne hoap breefkaarte gesjtuurd oet New York, Paries, Roame, Nantes, Turien, Kopehage, Amsterdam en Berlien. Op zöstieënjaorige laeftied maakde Harie in 1895 ein proofrundje op de gloodnuuj wielerbaan van Amby. Hae waas danig ónger de indrök van de piste, getuge zien opmirking nao aafloup taenge de pesjtoar van Amby: "De baan löp wie 'n tiet, menier pestoer".
Meijers woort profwielrenner ónger angere óm raeje dat hae de waereld wol óntdèkke en, in eine tied dat zoaget neet gans vanzelfsjpraekend waas, gek waas op reize. Zoa woort hae ein van de pioniere van 't Nederlandse fitserenne en róndj 1900 greujde hae oet tot ein fenomeen in de internasjenale baanwielrennerie. Hae naom veurnamelik deil aan zösdaagse en óntpópde zich tot eine renner mèt 'ne vliemsjerpe eindjsjprint en 'n bliksemsjnel demaraasj. In dae tied ware baanwedsjtrieje en zösdaagse heel erg populair biej de middeklas en 't wirkvolk in de groate sjtaej, 't waegrenne sjtóng doe nog in de kènjersjeun. Harie Meijers deeg mit aan diverse zösdaagse in de Vereinigde Sjtate wo-ónger dae van New York. Ouch won hae diverse Grand Prix, wo-ónger dae van New York en drie maol dae van Peries o.a. in 't jaor 1900 tiedes de Waereldtentoansjtèlling wo ein priezegeld van 7000 göjje koosj waere verdeend.
Hae naom ouch diverse keëre deil aan 't Waereldkampioensjap sjprint en woort zoawaal in 1900 es in 1902 tweëde achter de vermaarde Deense sjprinter Thorvald Ellegaard. In 1903 zouw hae in Kopehage nog èns derde waeren, ouch noe achter Ellegaard en de Duutsjer Willy Arend.
Ouch waas hae vief keër Nederlands kampioen sjprint en eine keër Éngelsj kampioen sjprint.
Harie Meijers waas de eësjte dae de biejnaam 'Second Eternal' (Eëuwige Tweëde) kroog. In 1928 euverleej hae op 48-jaorige laeftied aan tyfus.
Trivia
[bewirk | brón bewèrke]- In mei 1902 hèj Harie Meijers de beroemde Amerikaanse wielerlegènde Marshall Taylor, de waereldkampioen sjprint van 1899 mèt de biejname Major, de vlegende neger en de gekleurde cycloon, euvergehaold óm heëlemaol nao Amby biej Mesjtreech te kómme óm ein sjprintduel mèt häöm aan te gaon op de lokaal wielerbaan. Heël Mesjtreech en Amby ware oetgeloupe en vergaapde zich aan de zjwarte Amerikaanse sjprinter. Eine zwarte mins op de wielerpiste hèjje ze nog noats gezeen. De zjwarte Amerikaan goof de lokale favoriet Harie Meijers ouch nog èns sjprintles.