Alphonse Olterdissen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Beeld vaan Alphonse Olterdissen door Willem Hofhuizen, aon de Groete Lurestraot in Mestreech

Alphonse (Fons) Olterdissen (Mestreech 12 december 1865 - aldao 24 fibberwarie 1923) waor 'ne Mestreechse sjriever en diechter. Zien wèrk, dat besteit oet toneelstökker en opera's, behuurt tot 't bekindste wat oets op 't Mestreechs of zelfs op 't Limburgs gesjreve is. 't Slotkoer vaan zien kemikke opera Trijn de Begijn woort later 't Mestreechs Volksleed.

Leve

Olterdissen woort in Mestreech gebore, meh umtot heer 'ne Duitse vaajer en 'n Zieuwse moojer had waor 't Nederlands zien moojertaol. Heer lierde 't plat evels op straot. In 1883 góng heer in Amsterdam nao de Rijksschool voor de Kunstnijverheid. Wie heer dao-op aofstudeerde begós heer 'n teikensjaol in Mestreech, die gei succes woort. Later in de jaore negeteg begós heer ziech veur de promotie vaan 't Mestreechs toerisme in te zètte mèt de vereineging Maastricht Vooruit. Zie gebrek aon zakelekheid lieverde häöm 'n enorm sjöld op.

Die sjöld perbeerde heer aof te losse mèt kemediestökker en operèttes. Nao e paar flops trof heer in 1907 doel mèt De kaptein vaan Köpenick, e stök op 't Mestreechs en euver 'n in die daog hendeg populair thema: de nep-kapitein Wilhelm Voigt. 't Waor mie es genóg veur zien sjöld te kinne absolvere. De twiede kemikke opera, bovegeneumpde Trijn de Begijn, woort ouch 'n hit. Bij bei stökker verzörgde zie broor Gustave Olterdissen de meziek, dee veural oet arranzjeminte vaan bekinde aria's en (kinder-)leedsjes bestoont. Vaanaof 1916 heel heer ziech bezeg mèt 't sjrieve vaan columns, ouch op 't Mestreechs.

Bibliografie

• Alfons Olterdissen's prozawerken in Maastrichts dialect (bundel mèt columns, 1926)
• Ebook en Audiobook door Librivox