Graafstroom

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Graafstroom Gewaeze gemeinte in Nederlandj
Gevörmp	1986
Opgehaeve	2013
Opgegange in	Molenwaard
Provincie	Zuid-Holland
Hoofplaats	Bleskensgraaf
Opperflaakde (bie opluffing)	69,32 km²
– daovan water:	2,37 km²
Inwoeners (kort veur opluffing)	9.794 (1-2-2012)
– deechde:	146/km²
Lies van börgemeisters

Graafstroom is 'n veurmaolege gemeinte in de Nederlandse provincie Zuid-Holland, in de Alblasserweerd. De gemeinte, die 'n klein tiendoezend inwoeners had, bestoont oet 'n aontal dörper die in lintbebouwing um 't gelieknaomeg kenaal ligke, in 't verlèngde vaanein (zuug oonder). In 2013 fuseerde de gemeinte mèt Liesveld en Nieuw-Lekkerland tot de nui gemeinte Molenwaard.

Insignes

Umtot 'n combinatie vaan de zeve aw gemeintewaopes zoe good wie oonmeugelek waor, besloot me vaan e nui waope te make. Dit liet ziech zoe besjrieve: vaan goud, mèt drei dweersbalke vaan azuur, de boveste en oonderste gegolf. Dit waope stèlt de geografie vaan de gemeinte veur, mèt d'n Alblas, de Graafstroom en de Goudriaan. De middeste weurt um zie mie kenaalechteg veurkoume es rechte balk geteikend.

't Veendel is natuurlek gebaseerd op 't waope.

Plaotse

Geziech op Brandwijk, euver de Graafstroom

Meule De Vriendschap in Bleskensgraaf

De gemeinte umvatde de volgende kerne en naobersjappe:

• Bleskensgraaf
  • Abbekesdoel
  • Heulenslag
  • Hofwegen
• Brandwijk
  • De Donk
  • Gijbeland
• Goudriaan
• Molenaarsgraaf
  • Vuilendam
• Ottoland
  • Vuilendam
• Oud-Alblas
  • Noordzijde
  • Kooiwijk
• Wijngaarden

Aonzien

Wie de gansen Alblasserweerd waor de gemeinte waterriek en wie 't groetste deil vaan de streik is ze agrarisch vaan karakter, mèt groete weilen, brei slote en kenale en väöl windmeules. Alle dörpskerne höbbe 't karakter vaan lindörp, oetgestrek langs brei vaarte. De drei groetste waterluip zien d'n Alblas, de Graafstroom en de Goudriaan. De ierste twie ligke in 't verlèngde vaanein, al is d'n Alblas väöl krommer. Aon de noordkant vaan deze stroum ligke vaan wes nao oos Oud-Alblas-Noordzijde, Heulenslag, Bleskensgraaf-dörp, Gijbeland en Ottoland-zoord; aon de zuidkant vint me Oud-Alblas-dörp, Abbekesdoel, Hofwegen, Molenaarsgraaf en Ottoland-zuid. 't Ein dörp geit dus ummer naojeloes euver in 't aandert. 't Dörp en 't water Goudriaan ligke oostelek vaan Ottoland, e bitteke wijerop. Allein Wijngaarden en Brandwijk-dörp ligke gans boete de doorloupende lintbebouwing.

't Aontal rieksmonuminte waor besjeie: 87 in de ganse gemeinte.

Historie

Vörming

De gemeinte oontstoont in 1986, bij 'n gemeinteleke herindeiling in gans de regio. Sommege vaan de gemeintes hadde zelf ieder annexaties achter de rögk. De complete annexatiehistorie zuut zoe oet:

• Graafstroom (gevörmp 1986)
  • Bleskensgraaf en Hofwegen (gevörmp 1855)
    • Bleskensgraaf
    • Hofwegen
  • Brandwijk
  • Goudriaan
  • Molenaarsgraaf
  • Ottoland
    • Laagblokland (opgeheve 1857)
  • Oud-Alblas
  • Wijngaarden

Wijer woorte klein deile vaan de aw gemeintes bij buurgemeintes geveug, en kraog Graafstroom zelf e deile vaan de toen ouch opgeheve gemeintes Giessenburg (dörpskern nao Giessenlanden), Groot-Ammers, Langerak en Streefkerk (dörp in alle drei gevalle nao Liesveld).

Fusie

De fusie mèt Liesveld en Nieuw-Lekkerland, die op 1 jannewarie 2013 in wèrking traoj, waor sinds jaore in veurbereiing. De nui gemeinte geit Molenwaard heite en weurt op 1 jannewarie 2013 ingestèld.

Börgemeisters

In zie kort bestoon heet de gemeinte Graafstroom veer börgemeisters gehad.

Ambsperiood	Naom börgemeister	Partij	Bezunderhede
1 jannewarie 1986 - 1 september 1999	Gerrit (G.W.) Abbring	CDA	Vaan 1980-1986 börgemeister vaan Brandwijk, Molenaarsgraaf en Wijngaarden.
16 september 1999 - 1 juli 2005	Jan (J.) van Belzen	SGP
1 juli 2005 - 1 miert 2006	Loes (L.H.M.) van Ruijven-van Leeuwen	CDA	woernummend
1 miert 2006 - 31 december 2012	Dirk (D.R.) van der Borg	CDA	Tenao veurluipege börgemeister vaan Molenwaard

Bronne

Veur dit artikel is oonder mie gebruuk gemaak vaan nl:Graafstroom en nl:Lijst van burgemeesters van Graafstroom.

Externe link

• Site vaan de gemeinte