Gorinchem

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan Gorinchem in Zuid-Holland

Gorinchem (oetspraok Gorkum) is 'n stad en gemeinte in de Nederlandse provincie Zuid-Holland, aon de munding vaan de Linge in de Merwede, tege de grens mèt Gelderland aon. De gemeinte had per 1 januari 2006 34.271 inwoeners en besleit 21,99 km² (daovaan 3,03 km² water). Neve de stad Gorinchem kint de gemeinte ouch de kern Dalem.

Historie

Gorinchem, Gorinc's heim, oontstoont waorsjijnlik roond 't jaor 1000, meh weurt veur 't iers geneump in 1224 in 'n oerkónde vaan graof Floris IV. Later dezen iew kaom Gorinchem aon de hiere vaan Arkel, die 't in 1382 stadsrechte zouwe geve. Door zien positie zjus aon de grens mèt Holland en Gelder en neet wied ouch vaan Braobant en Utrei woort Gorinchem 'n vestingstad mèt sterke verdeidegingswerke. In 1417 woort de stad oetindelek door de graove vaan Holland vereuverd en ingelief. Tijens d'n Opstand in de Tachetegjäöregen Oorlog woort de stad in 1572 al vreug door de Watergeuze vereuverd; wie 19 geisteleke ziech verzètde woorte die aofgeveurd nao Brielle, boe ze opgehaange woorte. Dees geisteleke zien bekind koume stoon es de Martelere vaan Gorinchem. In 1673 maakde de stad deil oet vaan de Hollandse Waterlinie. Water waor trouwes e groet en ummer greujend probleem veur Gorinchem, wat dèks las had vaan euverstruiminge; oplossinge waore 't aofdamme en umleie vaan de Maos en 't graove vaan de Nieuwe Merwede. Gorinchem waor ein vaan de lèste plaoste boe de Franse legers ziech nao de val vaan Napoleon hadde trökgetrokke; in 1814 móste ze door de Britse armee oetgedreve weure. Nao 'nen dudeleken trökgaank in veurspood in de achtiende en negetiende iew herstèlde de stad ziech teslotte, mèt door 't graove vaan 't Merwedekanaal nao Utrei.

Externe link

• Website vaan de gemeinte