Golf van Napels

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

'n Kaart euvere Golf van Napels.

De Golf van Napels (Italiaans: Golfo di Napoli) is 'ne bej ane wèskus van Zuud-Italië.

Ane Golf van Napels ligke - van naordwès nao zuudoeas - de rwiens vanne aaj Romeinse stad Baiae, de Campi Flegrei mitte van oearsprónk Griekse stad Pozzuoli, de stad Napels, de Vesuvius mitte opgravinge vanne Romeinse stej Pompeii en Herculaneum enne plaatse Torre del Greco en Castellammare di Stabia. Ane zuudoeaskantj wuuert de Golf van Napels bepaoldj door 't sjiereilandj van Sorrento. De Golf van Napels wuuert zoea-gezag verlingk door drie eilenj: Capri in 't zujen en Ischia en Procida in 't naorde. Anger eilenj dao zeen Vivara in 't zuudwèste van Procida en Nisida bie Pozzuoli. Inne midde vanne golf ligken aevel gèn eilenj. 'n Meugelike verklaoring hieveur is det de ganse Golf van Napels 'ne caldera (de krater) van 'ne supervolkaan zów zeen.

De ómgaeving vanne Golf van Napels huuert biejen Italiaanse regio Campanië en vörmp mit mieër es 4,4 miljoen inwoonders de wichtigste agglomeratie van Zuud-Italië.

't Ganse gebied wuuert aangetas door e fenomeen geneump bradyseïsme, waat inhèltj det de oppervlakdje vanne aerd varieert in huuegdje óngeren invlood van 'n óngergrunjse magmakamer. Zoea is 't euverdeil van 't historisch Baiae óngerwiel eweggezak inne Golf van Napels; de kuslien van doe ligk allewiel op 'n deepdje van zoea 10 maeter ónger 't water. In Pozzuoli is 't historisch monument Serapium daoveur inne twieëdje hèlf vanne vurge ieëf nag veur e deil maeters gestege, dewiel 't complex ouch gelangentied ónger 't water gelaengen haet.