Gewerf

Van Wikipedia

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


Sjematische waergaaf van e gewerf.

E gewerf, gelenk of gewrich (Letien: articulus, articulatio of junctura) is 'nen euvergank tösse twieë knäök wobie bewaeging meugelik is; 't is dus 'n diskóntinu verbinjing.

Knäök kónnen op versjillige menere mit einanger verbónje zeen. 't Kan zeen det knäök aan einanger vaszitte middels beveurbeildj kraakbein, bindjweefsel of ganse vergreujing, wie bie 't sjeiel; den sprèk me van 'n kóntinu verbinjing.

Ómdet tiejes 't bewaege groeate kref op sómmige gewrichte kómme staon (wie in 't kneen), zeen de knaokoetènj in eder gewrich besjurmp middels kraakbein. Veure bewaeging tösse de knäök soeppel te laote verloupe bevindj zich inne gewerfsholte 'n sjruueperige vleujstof: 't synoviaal voch, det is ómgaove door sliemvlees: 't synovium.

De knäök in e gelenk waeren oppe plaats gehaje dore zoea-geneumdje gewrichsbenj (ligamente). 'ne Bandj besteit oet hieël stroef bindjweefsel, zoeadet kref waeren opgevange. Anger hölpstructure die t'r verstaeviging en besjurming kónne veurkómmen inne gewerve zeen de meniscus (in 't kneen), 'n tössewervelsjief en 'n sliembuuers (bursa, inne sjóljer, d'n èllebaog en 't kneen).

Blessuurs óntstaon döks ómdet 'n bepaoldje hölpstructuur raak besjajig bie euverbelasting van e gelenk. Veurbiljer zeen de sjäöring van 'ne gewrichsbandj (wie de kruutsbandj of d'n inkelbandj), de besjajing vanne meniscus of de óntstaeking aan 'n sliembuuers.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Gewerf&oldid=383703"