Stein (geologie)
Dit artikel is gesjreve (of begós) in 't Sint-Joasters. Laes hie wie v'r mit de versjillende saorte Limburgs ómgaon.
In de geologie is stein 't vas, consistent matterjaal det in d'n óngergróndj ónger de baom ligk. Stein is opgeboewdj oet fragmente, die klaste waere geneump, of oet minerale.
De aerdkoosj is opgeboewdj oet talloaze saorte aan stein. Ze bepaole in wichtige maot de eigesjappe van de aerdoppervlakdje: 't reliëf en landjsjap, de draagkrach van d'n óngergróndj, de baomvörming en de waterhoeshaojing. Stein kan in drie houfgruup waere verdeildj aanhandj van de meneer worop 't zich vörmp. Stollingsstein óntstaont door 't stolle van gesmóltje stein (magma); sedimentair stein door 't bezinke of deneerslaon van sediment, en metamorf stein door 't greuje van nuuj minerale in anger stein. Door verwaering en erosie kan stein waere aafgebraoke, 't matterjaal det wuèrtj aafgeveurdj kan op 'n anger plaats terechkómme en dao weer nuuj stein vörme.
Oet stein waere minerale, ertse of elemente van economisch belank gewónne. Stein zelf kan ouch waerdevól zeen, wie toegepas es netuurstein, wie graniet en marmer.
Zuuch ouch
[bewirk | brón bewèrke]- Stein in Limbörg
- Stein (matterjaal)