George Sand

Van Wikipedia

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.


George Sand es 31 jaorige, gesjilderd door Charpentier in 1835

George Sand waor ´n Franse sjriefster en de sjoelnaam van Amandine-Aurore-Lucile Dupin. Zie woort gebore op 1 juli 1804 in Paries en woonde op ´t landgood Nohant in ´t departement Indres.

Nohant

Wie ze 5 jaor waor sjtörf häöre vader bie 'n ongelök mèt e peerd. Ze trouwt in 1822 mèt Casimir Dudevant en ze kriege 'ne zoon, Maurice (1823) en 'n dochter Solange (1827). In 1825 maak ze 'n reis door de Pyreneë. In 1831 goon Dudevant en Aurore oetrein, de wèttelik sjeiing volg in 1836. In 1831 vertrèk Aurore Dudevant nao Paries um dao deil te numme aan 't politiek, journalistiek en literair leve. De kinger blieve op Nohant. Van 1831 tot 1833 haet ze Jules Sandeau es vrund. Same mèt häöm publiceert ze "Rose et Blanche". Nao ziene achternaam creëert ze in 1832 häöre sjoelnaam Sand. In 1833 lièrt ze Marie Dorval kènne en begint ze twiè jaor 'n relatie mèt de diechter Alfred de Musset. Mèt häöm reis ze nao Italië en Venetië. In 1837 sjtörf häör moder. Van 1838 tot 1847 haet Sand 'n relatie mèt de componis Frédéric Chopin en van 1850 tot aan ziene doad in 1865 ies zie 15 jaor same mèt Alexandre Manceau. De lètste jaore van häör leve ies zie veural bevrund mèt Gustave Flaubert. Zie sjtörf in Nohant op 8 juni 1876.

George Sand, foto van Nadar

Bie de vrung en kènnisse van George Sand huèrde de pianis-componis Franz Liszt, de sjilder Eugéne Delacroix, de sjieversj: Honoré de Balzac, Victor Hugo en Alexandre Dumas.

Ze haet ziech ingezat veur 't behoud van de 12e ièwse fresco's in 't Romaans kèrkske "Saint Martin" oet de 11e ièw van Nohant-Vic, e dörpke vlak bie Nohant.

George Sand waor 'n opvallende persoonlikheid en 'n feministe. Ze waor gekleid es man, roukde sigare, droog 'ne mannelike sjoelnaam en sjreef sociaal-kritische artikele.

Werk[bewirk | brón bewèrke]

Häör oeuvre besjting oet tièntalle romans, toneelsjtökker en politieke, sociaal-kritische en journalistieke artikele. o.a.

  • 1831 Indiana
  • 1832 Lélia
  • 1837 Mauprat
  • 1842 Un hiver á Majorque; Consuelo; Horace
  • 1844 Jeanne
  • 1845 Le meunier d'Angibault; Le péché de monsieur Antoine
  • 1846 La mare au diable; Isidora; Teverino
  • 1847 Lucrezia Floriani
  • 1848 La petite Fadette
  • 1854 Adriani, Histoire de ma vie
  • 1862 Atour de la table, Souvenirs et impressions littéraires
  • 1863 Mademoiselle la Quintinie
  • 1873 Impressions et souvenirs, Contes d'une grand-mère

brón o.a. "George Sand, Un diable de femme", Anne-marie de Brem, oetgaaf 2006.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=George_Sand&oldid=438888"