Aels (drank)
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
Aels ies 'n soort sjterke drank, jenever of borrel, dae vreuger gemaak woort in Baek in Nederlands Limburg door de sjtokerie Hennekens (noe 't Els-museum). Allewiel weurt Els la Vera, zoa klink de volledige naam van 't produk, gemaak door Bols.
Aels ies 'ne bitteren drank, woa-in 't kroed aels verwèrk weurt. Es 'r vaerdig gesjtook ies bedreug 't alcoholpercentage 34%. Me drink 'n Aelske oet 'n klein dröpkesglaeske, dat van te veure deepgevrore maog zin. Allewiel weurt de drank ouch gecombineerd mèt koffie, soeker en roum, dat dan es Limburgse koffie op de kaart sjteit.
Aels in de euregio
[bewirk | brón bewèrke]Aels weurt ouch nog op ander plaatse gemaak, nl op 't Belsj in Raere (de Raerener Els) en in Duutsjland de Monschauer Els, de Kalterherberger Els, de Hüllenkremer Els en de Reichensteiner Els (etc). Op 't etiket van de flesj van dae lètste kruidenbitter sjteit gesjreve, dat 't good Reichenstein in de Hoage Vene in de Eifel, 'n Kloaster van de Premonstratensersj, al 150 jaor nao tradiioneel recep Els fabriceert en dat de naam Reichensteiner wèttelik besjermp ies. In Tilburg weurt ouch 'ne soortgelieke drank gemaak.
Herkomsbesjerming
[bewirk | brón bewèrke]Op 13 december 2007 weurt bekènd gemaak dat gewèrk weurt aan 't kriege van 'n herkomsbesjerming veur dit sjtreekproduk, zoawie de Hasseltse jenever, de Welzje peket en 't Herfs kièske die die besjerming al höbbe.