Aerdsjóddel van Nepal (2015)
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
De aerdsjóddel van Nepal waas 'nen aerdsjóddel dae optrooj op 25 april 2015 óm 11:56:26 Nepalsen tied (7:11:26 in Midden-Europa) mit 'n krach van 7,8 oppe sjaol van Richter en 'n verinnewerendje krach (IX) oppe sjaol van Mercalli. 't Epicentrum loog óngevieër 34 kilomaeter t'n oeaszuudoeaste van Lamjung, mit 'n hypocentrum van róndje tieën kilomaeter aan deepdje. 't Is de sjajelikste ramp in Nepal saeren aerdsjóddel tösse Nepal en Bihar in 1934. Biejen aerdsjóddel zeen mindestes 5.000 luuj ómgekómmen en mieër es 10.000 gewónje. De meiste slachoffers volen in Nepal, meh ouch vole slachoffers in ómringendje lenjer worónger India, Sjina en Bangladesj.
d'n Aerdsjóddel veroearzaakdje 'n reeks van lwiens oppe Mount Everest, wobie mindestes zevetieën luuj óm 't laeve kome. Dit maakdje 't de doeajeliksten daag oppe berg. Ieëvenaaj geboewer inne vallei van Kathmandoe, 'n UNESCO-Weltirfgood, woorte verwós.
Naosjoekke bleve zich veurdoon door gans Nepal, mit 'nen inkele sjoek dae 'n krach van 6,7 oppe sjaol van Richter haw, op 26 april óm 12:54:08 Nepalsen tied (08:09:08 in Midden-Europa).
Inkel menuut naodet de ramp zich vóltróch zatte de Indiase euverheid, via de kriegsmach, "Operaasje Maitri" op, 'n groeatsjaolige humanitair missie mit es houfènj hölpacties in Nepal op te zètte.