Diana Spencer

Van Wikipedia
Naar navigatie springen Jump to search

Dit artikel is gesjreve in 't Heëlesj. 't Weurt gewaardeerd óm in dit artikel 't Heëlesj aan te hauwe of aan te gaeve welk anger dialek gebroek is.


Prinses Diana in 1987

Diana Spencer, Prinses va Wales (* Sandringham (Norfolk), 1 juli 1961 – † Paries, 31 augus 1997) woar de ieësjte vrouw va d'r Britse kroeënprins Charles en módder va de prinse William en Harry. Diana Spencer weëd óch nog dök Lady Di(ana) of prinses Diana geneumd.

Leëvesloop[bewirk | brón bewèrke]

De ieësjde joare[bewirk | brón bewèrke]

Diana woar de jónkste dochter va Frances Ruth Burke-Roche en höar man Edward John Spencer. Ze woar doadurch aafsjtammeling va vöal kuëninge van 't Brits kuëninklig hoes. Diana houw twieë sjwestere, Sara en Jane, zoewie óch nog 'ne broar, Charles. Noa d'r doeëd va höare groeëtvadder in 1975 kreeg zie d'r titel Lady Diana. Zie volgde höar ópleiding in Norfolk en in 'n kossjoeël i graafsjap Kent. 't Letste joar maakde zie aaf in 'n sjoeël i Zjwitserland.

Zie blonk neet oet óp sjoeël, evvel waal in zjwumme, doeke en polo.

D'r tied mit d'r Charles[bewirk | brón bewèrke]

Wie Diana nuëgetieën woar, raakde zie bevrund mit d'r Prins va Wales. Óp 24 fibberwaar 1981 verloofde 't sjtel zich en óp 29 juli dat joar trouwde 't i g'n St. Paul's Cathedral i Londe. Noa de trouwerei woeëd Diana hieël populair bei 't Britse volk. Óch woar zie de mieëtst gefotografeerde vrouw óp g'n welt. I de tachetiger joare houw zie 't Britse hulpprogram ter behandeling van aids óngersjteund. Doaneëve bekommerde zie zich bevuurbild óch uëver erm lüj en weeskinger. In 1982 woeëd d'r prins William geboare, twieë joare sjpieëder d'r Harry. I de vreuge nuëgetiger joare klapde 't tussje Charles en Diana. In 1996 sjeide 't sjtel.

Noa de sjeiing[bewirk | brón bewèrke]

De sjeiing in 1996 brach 't Brits kuëningshoes in ersjtige verleëgeheed. De Diana verloar höar predicaat Kuëninklig Hoeëgheed. Zie bleef evvel lid van 't kuëningshoes. Ze zetde zich i vuur 't aafsjaffe va lankmienge en bezoch doavuur vuurmalig kreegsgebeder, wie Bosnië en Angola.[1]

I de nach van 30 óp 31 augus 1997 om 00:22 oer raakde zie ernsjtig gewónk bei e auto-óngeluk i g'ne Alma-tunnel i Paries. Zie sjtorf veer sjtónde sjpieëder aa höar verwónginge. 't Berich va höare doeëd houw vöal teweëggebrach. 't Kuëningshoes woeëd sjterk bekritiseerd vuur 't loate oetblieve van 'n officieel reactie en 't sjtrik vashaote aan 't protocol. Zoe woeëde de vane van kuëninklig paliese neet haofsjtók gehese. Diana loog ópgebaard in 't St. James's Palace. Óp 6 september volgde de begreffenisplechtigheed. De officieel ceremonie in 't centrum va Londe trok 3 mieljoeën lüj; noa sjtatting bekieëke 2,5 mieljard lüj de plechtigheed óp d'r televies.

De Diana ligk begrave óp lankgood Althorp, óp e eilendje in 'ne wiejer. Óp 't lankgood guëf 't e museum dat is gewied aa höar.

Extern linke[bewirk | brón bewèrke]

Commons-logo.svg Commons: Diana, Princess of Wales – Media gerelateerd aan dit óngerwerp

Brónne[bewirk | brón bewèrke]

Dit artikel is gebaseerd óp 't corresponderend Ripuarisch en Luxemburgs artikel.

  1. De Volkskrant - Diana geprezen om haar werk voor uitbannen landmijnen
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Diana_Spencer&oldid=421742"