Daal (geografie)

Van Wikipedia

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


E baekdaal vanne Gölp bie Slennich.

E daal is 'n lankgerekdje lieëgdje, inzinking of verdeping in 't landjsjap, döks tösse hoeagvlakdje, häövelen of berg. E daal wuuertj sómtieds ouch waal 'n vallei geneump, beveurbeild in 't geval vanne Gelderse Vallei.

De meiste daler zeen óntstange dore oetspeuling van 'n baek of 'n reveer, mer ouch gletsjers en bewaegingen innen aerdkoosj kónnen 'n biedraag leveren in 't óntstaon van e daal. Op basis vanne óntstaonsgesjiechte waeren U-daler en V-daler óngersjeie. U-daler zeen oetgeslete door gletsjers en V-daler door baeke. In gebiede mit berg, wie in beveurbeild Oeasteriek, Zwitserlandj en Noorwaeg, zeen de daler dudelik te óngersjeie. Dao waere de hellingen aan beidskenj van 't daal gevörmp dore berg. "Daal" guuef hie 't versjil mitte ómligkendje berg aan.

Vanwaenge de toegenkelikheid ligken in bergechtige streken alle stej en de meiste dörper in 't daal. Boetedet is e daal döks 'n vröchbaar plaats, aangezeen water 't lieëgste puntj zeuk. 't Ligk ouch besjöt taenge windj en kaaj. Euver 't algemein is de temperatuur in 't daal hoeager es inne berg óm 't daal haer.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Daal_(geografie)&oldid=363938"