Camiel Eurlings

Van Wikipedia
Gank nao: navigatie, zeuke
Camiel Eurlings

Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.


Camiel Martinus Petrus Stephanus (Camiel) Eurlings (Valkeberg, 16 september 1973) ies 'ne Nederlandse CDA-politicus.

Eurlings ies de oudste zoon van Martin Eurlings, dae gedeputeerde waor in Nederlands Limburg en daonao börgemeister van Valkeberg. Hae greujde op in Valkeberg. Eurlings doorleep 't gymnasium in Mestreech en sjtudeerde van 1993 tot 1998 Technische Bedriefskunde in Eindhove, 'n sjtudie die hae cum laude aafmaakde. Op 12 april 1994 kaom hae in de gemeinteraod van Valkeberg; hae waor doe in Nederland 't jongste raodslid oats.

In 1998 kaom Eurlings op de kandidatelies van 't CDA veur de Twiède Kamerverkezinge. Hoewaal hae op 'n ónverkeesbaar plaats sjtong, woort hae door 'n intensief campagne mèt veurkeurssjtumme gekoze. Hae kaom in 't besjtuur van de fractie en woort in de Twiède Kamer woordveurder op 't gebeed van Europese Zake, Boetelandse Zake en Verkièr.

In 2004 waor Camiel Eurlings liestrèkker veur 't CDA bie de verkezinge veur 't Europees Parlement. Op 20 juli 2004 woort hae lid van 't Europees Parlement en waor dao veurzietter van de CDA-delegatie. Hae heel ziech bezig mèt Boetelandse Zake en Burgerlike Vriehede, Justitie en Binnelandse Zake (2004). Hae woort Europees bekind door zien opdrach m.b.t. de vraog of Turkije vaerdig ies veur toetraejing tot de EU. Saer begin 2006 waor Eurlings ónder-veurzietter van de EVP (Europese VolksPartiej) woavan de Belsj Martens (CVP) de veurzietter waor.

Van februari 2007 tot februari 2010 haet hae es minister van verkièr en watersjtaat zitting genómme in 't kabinet-Balkenende IV.

Op 11 miert 2010 maakde Eurlings bekènd dat hae ziech neet veur de verkezinge van 9 juni 2010 veur de Twiède Kamer besjiekbaar zal sjtèlle en dat hae zich tiedelik oet de politiek zal truuktrèkke um privé-rae. Veur gans politiek Nederland en ouch veur zien eige partie, 't CDA, waor dit ein groate verrassing, aangezeen hae door väöl luuj woort gezeen es de "kroanprins" veur opvolging van Balkenende es leider van de Christendemocrate.

In februari 2011 woort bekènd dat dae toetraoj tot de directie van KLM.[1] Vanaaf 1 juli 2013 waor hae zelfs veurzietter. Op 15 oktober 2014 aevel traoj hae truuk; häöm woort verwete dat hae de ónras bie fusiepartner Air France, boe 't personeel in sjtaking waor, neet good hauw aangepak.[2] Saer 10 september 2013 ies hae lid van 't Internationaal Olympisch Comité, woa hae keuning Willem-Alexander vervingk.[3]

Commons
In de categorie Camiel Eurlings van Wikimedia Commons zeen media gerelateerd aan dit óngerwerp te vènje

Bronne[bewirk | brón bewèrke]

  1. Nu.nl - Camiel Eurlings directeur bij KLM
  2. Nu.nl - Camiel Eurlings stapt op als topman bij KLM
  3. Nu.nl - Eurlings officieel benoemd tot IOC-lid
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Camiel_Eurlings&oldid=394162"