Bruno Bruins

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Bruno Bruins in 2018 bij e bezeuk in India

Bruno Johannes Bruins (Arnhem, 10 juli 1963) is 'ne Nederlandse politicus vaan de liberaol-conservatieve VVD en veurmaolege minister veur Medisch Zörg (Medische Zorg) in 't Kabbinèt-Rutte III.

Bruins studeerde rechte in Groninge, dao waor heer ouch aktief es sikkertaris vaan de jäögbeweging vaan VVD, JOVD. Vaan 1996 bis 2002 waor Bruins lid vaan de gemeinteraod in D'n Haag. In 2000 woort heer ouch wèthawwer vaan dees stad en dat bleef heer bis 2006, wie heer veur e jaor Nederlands staotssikkertaris vaan Oonderwies, Kultuur en Weitesjap woort in 't Kabbinèt-Balkanende III, boe-in de CDA 'n coalitie vörmde mèt zien partij, de VVD. Dees coalitie bleek evels gei groet succes te zien en veel al in fibberwarie 2007. Datzelfde jaor góng Bruins trök nao de lokaal polletiek, en wel veur e paar maond es woernummend börgemeister vaan de Zuid-Hollandse gemeinte Leidschendam-Voorburg. Daonao góng Bruins tijdelek 't bedriefsleve in, oonder aandere es direktäör vaan 't verveursbedrief Connexxion.

Wie 't kabbinèt-Rutte III woort ingestèld in 2017, woort in 't indverslaag vaan de coalitiegesprekke veur d'n ierste kier de nuie ministerspos Medische Zörg geneump. 't Geit hei um e ministersjap zoonder portefeuille; dat wèl zègke, e ministersjap zoonder eige ministerie. In plaots daovaan vèlt de minister veur Medische Zörg direk oonder 't Ministerie vaan Volksgezoondhied, Welzien en Sport, boevaan allewijl de CDA'er Hugo de Jonge minister is. Es minister vaan Medisch Zörg waor Bruins belas mèt geneeskundege zörg, de zorgverzekeringswèt en zörgtouwslaag, touwziech op veujselkwaliteit, baone, opleiing en arbeidsmerretbeleit veur de zörg, gezoondheidsbesjèrming, medische biotechnologie, genees- en hölpmiddele, drugsbeleid en 't sportbeleid vaan de zörg.

Tiedens e laankdoereg debat in de Twiede Kamer euver 't coronavirus op 18 miert 2020 kraog Bruins las van flawwegheid, door euververmeujdheid. Einen daag later verliende de keuning 'm op eige verzeuk iervol oontslaag.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Bruno_Bruins&oldid=460998"