Kesjtièl Obbendorf

Dit artikel is gesjreve (of begós) in 't Sjömmerts. Laes hie wie v'r mit de versjillende saorte Limburgs ómgaon.

Kesjtièl Obbendorf, ouch de Bockhaof en hoes Haasdal geneump, bevingk zich in 't gehuch Hazel bie Sjömmert in de gemeinte Baekdale in Zuud-Limburg. De pachhaof lik aan de waeg Groat-Haasdal. 't Kesjtieëlke, dat via 'n waegske, Billich geneump, langs de haof is te bereike, is geboewd van baksjtein mèt helsjteine lieste um deure en vènstere. Op 't noorde haet 't 'ne barokke krolgevel. 't Veerkentig teurentje, oet 1677, is geseerd mèt 'n tentdeekske woa-op 'n kupelke en sjpits in de vorm van 'n doorgesjneje un. Gans baove drop sjteit 'n windvaan oet de 18e ieëw mèt 't familiewaope Von Bock.

De rechheukige kesjtièlhaof is gedeiltelik geboewd in mergel. De 2 groate róndbaogpaorte aan de binneplei höbbe baksjteine reng. Ein van de baksjteine moere van de sjuur is gelardeerd mèt mergele sjpeklaoge. De haof haet 'ne groate voluutgevel mèt in de tuup twieë ulelaoker.

Gesjiedenis

't Complex besjteit oet 'n hieërehoes, Obbendorf, en 'ne pachhaof. Ónder 'n sjuur bevinge zich nog twieë tóngewelve, die wieze nao 'n ouwer geboew. Bie 'n verboewing in 1848 is dat verdwene. Op 'ne latei in de taore kènt me laeze, dat arnoldus godefridus de bock me restauravit 1677 de tore haet geboewd same mèt de zuud- en oasgevel. Dae lètste gevel is in 't begin van de 19e ieëw gerenoveerd in neo-klassicistische sjtiel. De sjeetlaoker zint gebleve. Rónd 1960 volg wir 'n renovatie en dan waere rónd de vènstere helsjteine lieste aangebrach, die aafkómstig zin van 't aafgebraoke kesjtièl Walborg in Ohé en Laak.
De aetkamer is ónderkelderd mèt 'n tóngewelf. 't Interieur van de "belle-etage", hal en kamersj sjtamp oet begin 19e ieëw.

De pachhaof besjteit oet 'n sjuur en 'n pachtersjweuning. Nao 1840 huèrt dit neet mieë bie 't good van 't kesjtièl. Dan krig 't hieërehoes 'ne eigen ingank via 'ne ziewaeg langs de sjuurgevel. De ruumde tösje haof en kesjtieël waert dan binneplei, dae aan de oaskant weurt aafgesjlaote door 'n paort. Nao dees sjplitsing volg nog 'n twieëde. Eine sjtalvleugel, haoks op de waeg Groat-Haasdal, weurt dan es weuning ingerich. De veurgaevele, mèt twieë eigenaere, weure op 'n gegaeve moment bedèk mèt seerpleisterwerk.

Beweunersj

't Riddergesjlach Van Hafkesdael is bekènd saer de 12e ieëw. Zie zölle hie 'n versjterk hoes of kesjtieël höbbe gehad. Van 't kesjtieël Obbendorf is pas ieëwe later sjpraoke. De naam Obbendorf zal in de 17e ieëw versjiene. Waarsjienlik geit dae naam truk nao oben 't dörp vanwege zien ligking baove of achter in 't gehuch. De naam Bockhaof dateert ouch oet dezen tied vanwege de familie Von Bock. Dees familie kump oarsjprónkelik oet Aoke en in de 17e ieëw zal zie versjillende kesjtieële in eigendóm kriege. Dao huèrt ouch Obbendorf bie. In 1729 is d'r 'n boedelsjeiing, woabie Peter Willem Frederik von Bock 't hieërehoes krieg en zien zuster Anna von Bock de haof. In 1745 sjtörf Peter Willem Frederik. Hae haet gein kinger. 't Complex kump dan in heng van Anna Maria von Bock. Zie is getrouwd mèt Nicolaes Somija, de pachboer. Umdat zie 9 kinger kriege zal 't erfgood versjnippere. In 1796 is Thomas Hondts getrouwd mèt Maria Somija eigenaer. Hae zal ouch burgemeister waere van Sjömmert in de tied van de Franse bezètting.
In 1848 lièt eigenaer-landboewer Nicolaas Voncken, getrouwd mèt Maria Ida Loyens, nog get verboewinge oetveure. 'ne Gevelsjtein mèt 1848 en de initiale FWV en MIL herinnere dao-aan. Hun zone verpachte dan hoes en land saer 1929.
In 1942 is d'r 'ne groate brand nao 'ne blikseminsjlaag.
In 1959 waert de familie Stassen door koup eigenaer. Zie lièt de geboewe, mèt hölp van de Monumentezörg restaurere.

Brón

Ó.a.: 2005 Kastelen in Limburg ISBN 9053452699