Bernard Wesphael

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Bernard Wesphael (Wèrm [Waremme/Borgworm], 25 september 1958) is 'ne Belzje franstaolege politicus vaan linkse signatuur.

Loupbaon

Wesphael waor in 1980 stiechtend lid vaan de Franstaolege greun partij Ecolo en woort dao in 1999 veur in 't Waols parlemint gekoze. In 2004 woort heer herkoze en daonao beneump tot fractieveurzitter. In d'n iersten hèlf vaan 2005 deeg 'r vaan ziech hure door zie verzèt tege de Europese Groondwèt.

In 2012 góng heer same mèt Marie Corman veur 't duo-partijveurzittersjap vaan Ecolo. Ze kraoge 15% vaan de geldege stumme. Op 26 miert vaan dat jaor stapde heer evels oet de partij. Hei-op kraog 'r aonbode um bij versjèllende aander partije te koume, boe-oonder de PTB. Wesphael riechde ziech evels ieder op de Franse Parti de Gauche en kaom in aprèl mèt zien Mouvement de Gauche, 'n beweging mèt es doel 'n "rizzolute expressie vaan e nui democratisch, radicaol, greun, oonkèrkelek, börgelek links" te zien. In september 2013 evels maakde heer zien bedoeling bekind um zien eige beweging alweer te verlaote, umtot heer dao neet de gewunste lijn in kós trökvinde.

Zaak-Wesphael

Op 1 november 2013 woort Wesphael op bevel vaan d'n oonderzeuksrechter in Brugge gearresteerd, op verdinking vaan de maord op zien vrouw Véronique Pirotton. De twie verbleve in 'n Oostends hotel. Volgens Wesphael waor zien vrouw depressief gewees en had ze häör eige umgebrach, meh forensisch oonderzeuk wees 'ne gewelddaodegen doed oet. Wesphael zien avvekaote perbeerde de arrestatie op te luffe um hunne cliënt zien parlementair oonsjenbaarheid, meh zoewel 't Waols parlemint es 't parlemint vaan de Franstaolege gemeinsjap gónge dao neet op in.

Bronne

Dit artikel is vertaold oet 't corresponderend Franstaoleg artikel, en wel in dees versie.