Benny Neyman

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.



Benny Neyman (9 juni 1951 - 7 februari 2008) waor 'ne in Nederland, Vlaondere en Duitsland bekinde zenger. Heer is gebore in Mestreech. Begin jaore '70 volgde heer 'n opleiing aon de Kleinkunst Academie in Amsterdam. In de twiede hèlf vaan de jaore '70 braok heer lankzaam door, mèr zien ierste groete hit scoorde heer pas in 1980 mèt 't nommer Ik weet niet hoe. In 1985 scoorde Benny Neyman zien groetste hit. Mèt Waarom fluister ik je naam nog haolde heer de ierste plaots in de Hollandse hitparades. Conny Vandenbos waor ziene mentor.
Z'n ierste suksesse behaolde heer mèt vertaolde chansons vaan Reinhard Mey, Stefan Sulke en Joe Dassin, zengers die in Nederland toen nog neet zoe bekind waore. Later maakde heer allein eige werk. In 1983 brach heer in Duitsland 't album Skizzen op de merret, gevolg door 'n album in '87 en '94. Dann ruf' ich wieder deinen Namen waor in 1985 oach in Duitsland 'n groete hit. Vaanaof de twiede hèlf vaan de jaore '80 scoorde Benny Neyman gein groete hits mie. Wel brach heer nog 'n groet aontal albums oet, die good verkochte en heer had 'n aontal suksesvol theatertoernees. In 1996 ontving heer 'n 'Gouden Harp'. Heer maakde in 2004 'n cd in 't Mestreechs, Trök nao Blouwdörrep. Ouch zóng heer inkel Ingelstaolege duette mèt de froontvrouw vaan Pussycat, Toni Willé.

In 2005 zóng Neyman same mèt 't orkes vaan André Rieu op 't Vriethof z'n Ode aon Mestreech in vief taole, te wete Nederlands, Duits, Ingels, Frans en Limburgs. Zien lètste optrejje in december 2007 waor 'n hommage aon Vandenbos.

Op 7 fibberwarie 2008 storf heer aon de gevolge vaan kaanker.

Bron[bewirk | brón bewèrke]

Extern linke[bewirk | brón bewèrke]

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Benny_Neyman&oldid=456320"