Antigone (Sophocles)
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Antigone (Aajdgrieks alfabèt: Ἀντιγόνη, mèt de emphasis op de o, neet wie de meiste Limbörgers op de i) is 'n tragedie oet de Griekse mythologie vaan d'n diechter Sophocles oet of veur 't jaor 441 veur Chr. 't Stök geit euver 't individueel geweite contra de staotswette of de moreel wette contra de minselek wette. Naotot Oedipus ziechzelf blind heet gemaak en nimmie keuning kin zien, numme zien zeuns Polyneices en Eteocles 't euver. Nao ruizing euver de force, vilt Polyneices de stad aon. Beij breurs hiemele en hunne noonk Creon, broor vaan Jocasta, nump 't euver. Nao dees euvernaome, eigelek metein nao de oorlog, vink 't verhaol aon.
't Verhaol
[bewirk | brón bewèrke]Antigone, dochter vaan Oediupus, nump 'r zöster Ismene nao boete um te praote euver de zaok. Creon wil hunne broor Eteocles begrave, evels neet Polyneices, dee ziech neet heet gehawwe aon de reigels vaan de stad. Me maag neet ins um häöm rouwe. Antigone wil häöm es nog begrave. Ismene belaof häör niks d'r vaan te zègke. Antigone wil zjus tot zie 't vaan de daker aof sjriewt.
'ne Seldaot infermeert keuning Creon tot iemes boete de stadsmaore Polyneices oonder de doedsrituele aon 't begrave is, de persoen oontsnapte evels zjus. Creon zeet tot me de persoen mót vinde en bis doed mót veroerdeile of de seldaote zölle zelf hiemele.
't Koer zink euver 't intelligent weze, de mins. Oondaanks zien intelligensie mót heer wel gooi gedechtes höbbe, aanders is heer verlore.
Antigone weurt opgepak mer ze vind 't neet erg; ze heet gedaon wat ze moos doen en zeet daobij tot al lui vaan de stad 't mèt häör eins zien, evels te bang zien veur Creon. Creon zuut häör zöster en zien nisjeke Ismene ouch es sjöldege. Ismene geit heimèt akkoord en wèl zoewiezoe neet wijer leve es Antigone mót hiemele. Dit gans en al oondaanks 't feit tot Creons zoon, Haimon, is verloof mèt Antigone.
't Koer zink euver de elend vaan de kinder en groetkinder vaan Labdakos en tot dit gans en al 'n vloek is vaan Zeus.
Umtot Haimon in deep rouw is, kump Creon nao häöm touw en zeet tot Haimon mót oetkieke veur zien hart, dat neet nao ziene kop mót stijge. Antigone zaw häöm zoewiezoe slech kinder sjinke. Zie mót hiemele in naom vaan de Wèt. Haimon laot weite tot heer zal luustere nao häöm mer adviseert häöm ouch mie te luustere nao de lui. Zie zien 't naomelek eins mèt Antigone. Creon is koed, zeet tot Haimon häöm neet oongestraf kin bekritiziere. Haimon zeet noets mie mèt 'm te wèlle praote.
't Koer zink tot de leefde 't mies krachtege is in de strij en tot de leefde veur 'n vrouw gans wiet kin gaon.
Antigone zeet adie tot de lui en hilt vas tot dit de gooi keus veur häör waor.
De woerzègker Tiresias zeet tege Creon tot 't slech is 'n levende te sjikke nao de doeije en 'nen doeije te hawwe tösse de levende en tot d'r get versjrikkeleks geit gebäöre. 'nen Advisäör vaan Creon zeet häöm tot Tiresias ummertouw geliek heet en Creon besleet dao-op Antigone trök te sjikke en e stanbeeld te bouwe veur Polyneices.
't Koer zink euver 't Verhaol vaan Bacchus en de stad vaan Thebe.
'nen Informant vertèld Creons vrouw Euriydice tot Haimon zelfmoord heet gepleeg. Wat bleek, Antigone waor al doed wie Creon beveel häör te bevrieje en wie heer d'r aonkaom, zoot Haimon al krietenterende veur 't haangend liechaom vaan Antigone. Wie Creon get perbeerde te zègke, stormde Haimon op 'm aof. Heer misde en woort tegegehawwe, boenao heer oet gebrek aon raod ziechzelf neerstik. Creon is daonao oontroesbaar. Evels weurt 't nog erger. Naotot Euriydice dit gans en al heet gehuurd, pleeg ouch zie zelfmoord. Creon besef wie 'n fout heer heet gemaak en heet alles verlore. 't Koer woersjoid de lui tot niemes de ieweg wètte maag negiere en veur ummertouw mót luustere nao 't verstand.
Brón
[bewirk | brón bewèrke]- Antigone, vertaold door Ian Johnston (1987)