Ameland

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Locatie vaan Ameland in Friesland

Ameland (Fries: It Amelân) is e wadde-eiland en 'n gemeinte in de Nederlandse provincie Friesland, mèt (1 augustus 2014) 3.591 inwoeners en 'n oppervlak vaan 273,00 km² (daovaan 215,43 km² water of wad). Op 't eiland ligke de kerne Ballum, Buren, Hollum en Nes.

Ameland weurt veur 't iers geneump in de achste iew; 't is daan nog gein eiland en is bezit vaan de graof vaan Holland. Bij de störmvlood vaan 1287, boebij in essentie de Waddezie gevörmp woort, raakde Ameland los vaan de wal.

In 1424 verklaort d'n hier vaan Ameland ziech "vrijen hier"; de titel "vrijhier vaan Ameland" zal tot in euzen tied bestoon. Wie in 1708 de hiere Cammingha oetstorve is dizze titel in han vaan de Oranjes gekoume (Willem-Alexander is allewijl daan ouch Vrijhier vaan Ameland); 't eiland waor sindsdeen feitelek in personeel unie mèt de Nederlen. In 1814 woort dit geformaliseerd. In 1871 begós me mèt 'nen dam vaan de wal nao 't eiland, dee 't jaor dao-op veerdeg kaom meh neet tege de störm bestand bleek: in 1882 sloog 'r eweg en me bouwde 'm neet obbenuits op.

Op Ameland sprik me sinds de achtiende iew gei Fries meh Nederlands; 't Amelands dialek liekent nogal op 't Stadsfries.

Externe link

• Gemeinte Ameland
• Amelander historie