Haofpaterskap
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
De haofpaterskap, of wie op 't Nederlandjs de tuinmonnikskap, (Aconitum x stoerkianum) is 'n plantj van hybride kómaaf, wovan versjillige cultivars bestaon. 't Is 'n plantj veur inne sierhäöf die 0,50 toet 1 m hoeag wuuertj, kan waeren aangepaotj in deiler van Europa en die nao verwiljering lang kan standjhajen op besjieëmdje, keul en vöchtige plaatse, wie ziejkantje van waterluip, nate graaslenj en kortbie weuninge. Ouch in Nederlandj kump de haofpaterskap verwiljerdj väöl veur.
De twieëslechtige blome van dit steriel taxon kónne paars, blaw, wit, bóntj of gemingk zeen. Blawgekluuerdje exemplare zeen good te óngersjeie vanne blawwe paterskap, doordet de bloomsstele kaal of slechs zwaak-behaordj zeen ennen helm hoger is es det t'r breid is. Bieje blawwe paterskap zeen de bloomsstele behaordj toet toebehaordj en is d'n helm breier es det t'r hoeag is.
Vanne alkaloïde die inne plantj zitten is 't giftigste aconitine 't wirkzaamste bestandjsdeil; 't wuuertj in traditioneel Aziatische genaeskónde gebroek taenge hertperblemen en zwaor nervepien.