Keuning Willem-Alexandertunnel
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
De Keuning Willem-Alexandertunnel (ouch bekind es: A2-tunnel) is 'nen tunnel in de Limburgse hoofstad Mestreech mèt 'n lengde vaan 2,3 kilometer. D'n aonlègk begós in 2011 en 'r is veur 't verkier op 16 december 2016 in gebruuk genome.[1] D'n tunnel weurt aongelag op 't tracé wat vreuger de bovegroondse N2 waor tösse de krusing mèt d'n Terblieterweeg bij stadion De Geusselt en 't knouppunt Europaplein. 't Oondergroondse tracé weurt dan oonderdeil vaan d'n otosnelweeg A2. De oonderbreking vaan de snelweeg en de files zien nao d'n aonlag vaan d'n tunnel veurbij. Bovenop d'n tunnel zal d'n awwe, bovegrondse, N2 weure umgebowd tot de Greune Luiper, 'ne laankgerèkde laon vaan buim vaan 't Europaplein tot in 't boetegebeed tösse Mestreech en Meerse.
Constructie
[bewirk | brón bewèrke]De Keuning Willem-Alexandertunnel is dobbellaogs en heet 4x2 rijstroke. D'n tunnel is heimèt d'n iersten dobbellaogsen tunnel vaan Europa dee ouch snelweegaofmetinge heet. De doorrijhuugde is 4,7 meter, boemèt 'r ouch gesjik is veur vrachverkier. Daoneve weure probleme bij de huugdedetectie wie bij de get langere Roertunnel vermijd. De oonderste tunnelbuis verwèrk doorgaond verkier euver de snelweeg vaan Eindhove nao Luik, mèt es maximumsnelheid hoonderd kilometer per oor. De boveste deent veur 't stadsverkier, boe de maximumsnelheid tachteg kilometer per oor is. In alle tunnebuize zal 'n inhaolverbod veur vrachverkier gelle. Venaof knouppunt Kruisdonk löp 'n parallelstructuur. Aon de zuidkant ligk knouppunt Europaplein. Dees aonsleting is get oongebrukelek vörmgegeve.
Gesjiedenis vaan de Mestreechse stadstraverse
[bewirk | brón bewèrke]De aw stadstraverse woort in 1959 aongelag en bestoont oet 2x2 rijstroke mèt geliekvloerse krusinge veurzeen vaan stopleechte. 't Gevolg heivaan waor tot al 't verkier door de oosteleke wieke vaan Mestreech mós, wat staank- en geluidseuverlas veroorzaakde. 'n Alternatief route gaof 't neet. Vaanaof de jaore '80 zeukde Rijkswaterstaat daorum nao meugeleke oplossinge veur dit perbleem. In 1982 woort e tracébesluut genome um d'n A2 door 'nen tunnel oonder Mestreech te laote lope. 't Plan um de N2 verdeep aon te lègke woort in 1998 aofgebroke um financiële rei. In 2000 hervatde me 't plan um de stadstraverse te oondertunnele en um te bouwe tot 'nen otosnelweeg. In juni 2009 woort 't beste plan, de bouwcombinatie Avenue2, definitief. D'n bouw begós in 2011.
Procedures
[bewirk | brón bewèrke]In 2010 woort 't oontwerp-tracébesluut gepubliceerd en op 24 november vaan dat jaor volgde 't definitieve besluut. 't Tracébesluut woort op 30 november 2011 onherropelek verklaord door de Raod vaan Staote. In april 2012 volgde de umgevingsvergunning, boenao d'n aonlègk kós aonvaange. Op 24 september 2013 woort bekindgemaak tot d'n tunnel de "Keuning Willem-Alexandertunnel" zouw gaon heite, nao d'n in dat jaor gekroende keuning Willem-Alexander vaan de Nederlen.
Verkiersintensiteite
[bewirk | brón bewèrke]In 2006 rijde daogeleks 48.000 oto's euver de N2 door Mestreech. Veur d'n A2-tunnel weure in 2026 93.300 oto's verwach.[2]
Fotogalerie
[bewirk | brón bewèrke]-
De N2 es veurmaolege stadstraverse door Mestreech in 2006 -
Gekapde buim in 't Geusseltpark mèt ziech op de rieksweeg -
Bij de kruising mèt de Sjanerweeg in 2010 -
De N2 tijdes d'n bouw in 2012 -
...in 2013 -
...en in 2015
Externe link
[bewirk | brón bewèrke]
|
Commons: Construction_of_A2_tunnel_(Maastricht) – Media gerelateerd aan dit óngerwerp |
Brón
[bewirk | brón bewèrke]Dees pazjena is gedeiltelek gebaseerd op 't corresponderend artikel op de Nederlandse Wikipedia. Wijer is gebruukgemaak vaan 't corresponderend artikel op de Wegenwiki.