Termaar (Klumme)

Dit artikel is gesjreve (of begós) in 't Klummesj. Laes hie wie v'r mit de versjillende saorte Limburgs ómgaon.

---

Mergele haof mèt klokgevel in Termaar

Termaar is 'n buurtsjap van Klumme in de gemeinte Voelender, gelaege op 't plateau in Zuud-Limburg. In 1840 sjteit 't te book es Maar en Straat en in 1866 es Maarshaal. Tösje de ouw beboewing aan de hoofdsjtraot bevingk zich eine mergele haof oet de 18e ièw ('n anker geuf 't jaortal 1742) mèt eine klokgevel. Ouch ligke d'r 'n paar vakwerkhoezer. 'n Waegkruuts mèt beeld sjtamp oet de 18e ièw. Same mèt de nuuj geboewde woonwiek, in terrasse aangelag, wone d'r 500 luuj in ca 200 hoezer. In 1526 laoge d'r 12 weuninge. De sjtasie van Klumme - Ranzel liek eigelek in 't del tösje Termaar en Ranzel.

Inwonersj

D'r sjriever Hub van der Maar (pseudoniem veur Huub Delahaye), zien zusters Net Frederix-Delahaye (sjriefster) en Maria Hoen-Delahaye (dichteres) en broor Albert Delahaye, archivaris en historicus, kómme hie vandaan. Huub, Net en Maj sjreve in 't dialek van Termaar. Dat dialek is (bekans) geliek aan dat van Klumme. Völ kinger oet dit gehuch ginge en goon nao de lièger sjoeël (basissjoal) in Klumme en de kinger vanne stationssjtraot loope nao de lièger sjoeël in Ranzel.

'n Ander Termaar bevingk zich in de gemeinte Mergraote.