Lèsbreef
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
'ne Lèsbreef ies 'n minibeukske wat handelt euver 'n bepaald thema wat toegepas kènt were in 't ónderwies. 't Betref hie ónderwerpe oet de Limburgse historie en volkscultuur, gesjreve op 't niveau van lièrlinge van de basissjoal oet de lètste groep (11- en 12-jaorige). Veldeke Limburg haet in 2007 't initiatief genómme um lèsbreve oet te geve veur deze doelgroep um dae kènnis te laote make mèt die ónderwerpe. 'n Belangriek ónderdeil van de Limburgse volkscultuur ies ouch de Limburgse taal, daorum ies edere lèsbreef gesjreve in 't dialek. De exemplare, die tot noe toe zint versjene, zint allenei in 'n ander dialek gesjreve, umdat in Limburg neet euveral 't zelfde dialek gekald weurt. Veldeke besjteit oet 11 kring in gans Limburg en eder jaor ies 'ne andere krink, oet 'n ander plaats, verantwoordelik veur de invölling van 't thema. Alle basissjoale in Limburg kriege 'n exemplaar ter inzage toegesjtuurd en kènne daonao de lèsbreve besjtèlle bie 't Hoes veur de Kunste in Remung. Veur in 't documentatiecentrum en um te behandele in de klas in de gesjiedenis- of aardriekskundelès.
Lèsbreve vanaaf 2007
[bewirk | brón bewèrke]De ièrsjte lèsbreef oet 2007 ging euver Sint Maerte (Sint Maarten), woavan de fièsdaag vèlt op 11 november. Hae ies gesjreve in 't Echs. Daonao volgde in 2008 de Kirmis in 't Zittesj; de Schötterie in 2009 in 't Venloos; d'r Weg in 't Heëlesj in 2010. De lèsbreef Mergel oet 2011 sjteit in 't Valkebergs en vertèlt euver mergel, de roumgaele sjtein woamèt zoaväöl geboewe rónd Valkeberg en Mestreech opgetrokke zint.
Euverziech lèsbreve in de Limburgse sjtreektaal
[bewirk | brón bewèrke]- In 2007 versjeen, in samewèrking mèt de Veldeke-krink-Ech, de lèsbreef: Sint Maerte, in 't Echs
- In 2008 versjeen, in samewèrking mèt de Veldeke-krink-Zitterd de lèsbreef: Kirmes, in t Zittesj.
- In 2009 versjeen in samewèrking mèt de Veldeke-krink-Venlo de lèsbreef: De Schötterie, in 't Venloos.
- In 2010 versjeen de lèsbreef d'r Weg in samewèrking met de Veldeke-krink-Heële, in 't Heëlesj.
- In 2011 versjeen de lèsbreef Mergel in samewèrking mèt de Veldeke-krink-Valkeberg, in 't Valkebergs. 't Beukske vertèlt euver mergel, de roumgaele sjtein woamèt in en um Valkeberg en Mestreech väöl geboewd ies gewore, euver wie en woa de sjtein gewonne weurt, euver fossiele en fauna, euver depe mergelgrotte en wat dao-in allenei gebeurt.
- In 2013 versjeen, in samewèrking mèt de Veldeke-krink-Remunj de lèsbreef Vastelaovend, in 't Remunjs. Vastelaovend, carnaval in al zien facette mèt 't oug op gans Limburg.